„Það er enginn að fara að deyja í höndunum á mér“

Handboltakappinn Logi Geirsson endurlífgaði eldri mann sem hafði farið í hjartastoppa á Tenerife. Þar var Logi í byrjun mánaðarins þar sem maðurinn keyrði á ljósastaur. Hann segir eldri konu hafa komið úr bílnum og kallað eftir hjálp af sálarkröftum. Logi náði manninum út úr bílnum og lagði hann á gangstéttina þar sem hann beitti endurlífgunartilraunum eftir að hann fann ekki púls á manninum.

Logi segir frá þessu atviki á Facebooksíðu sinni.

„Enginn púls fannst og bað ég hótelstarfsmann sem átti leið hjá að aðstoða mig við að leita púls og ljóst var að maðurinn væri í hjartastoppi. Ég hnoðaði hann 30 sinnum og ekkert virtist gerast nema að nokkur rifbein brotnuðu með látum. En eftir ca 20 kröftug þríhöfða hnoð í viðbót tekur maðurinn þessa svakalegu andköf sem mun aldrei renna mér úr minnum og hjartað fer að slá í honum! Mér tókst að endurlífga mann,“ segir Logi.

Logi segist oft hafa hugsað út í hvað hann myndi gera ef hann kæmi að manneskju sem þyrfti að hnoða og þá sérstaklega eftir að hann varð faðir.

„Pældi í því eftir á hvað ég hugsaði meðan ég var að hnoða hann. Hugsaði ég bara hann á eflaust börn og barnabörn í Sviss sem vilja sjá afa sinn aftur og ekki missa hann án þess að kveðja hann. Ég kem þessum manni í gang sama hvað, það er enginn að fara að deyja í höndunum á mér! Þetta var það sem ég hugsaði meðan hvert rifbeinið brotnaði á fætur öðru í hnoðinu.“

Hann ætlaði að reyna að hitta manninn, sem heitir Hans, daginn eftir atvikið en sjúkrahúsið vildi ekki veita honum upplýsingar um hann.

Logi segir að þegar öllu sé á botninn hvolft snúist þetta um boðskapinn.

„Verið búin að ákveða að hjálpa til þegar þið komið að svona aðstæðum, hvort sem það sé slys, hjartaáfall eða einhver í neyð. Við getum alltaf hjálpað.

Þú getur skipt máli og bjargað mannslífi líka.“