Leigja út 800 matjurtagarða

Opnað hefur verið fyrir umsóknir um átta hundruð matjurtagarða sem leigðir verða út á vegum borgarinnar í sumar, þar af eru tvö hundruð garðar í Skammadal í Mosfellsbæ. Matjurtagarðarnir í Skammadal eru um 100 fm hver garður og er leigan 5.000 krónur. Í Reykjavík er hver garður um 20 fm og er leigugjaldið 4.800 krónur.

Að sögn Jóns Halldórs Jónassonar, upplýsingafulltrúa hjá Reykjavíkurborg, verða garðarnir opnaðir í maí ef veður leyfir. Nánari upplýsingar er að finna á vefsíðunni reykjavik.is/matjurtagardar.

Umsóknir og fyrirspurnir sendist á netfangið matjurtagardar@reykjavik.is.

Reykjavíkurborg hefur einnig gert samning við Garðyrkjufélag Íslands um rekstur matjurtagarða við Stekkjarbakka og í Grafarvogi.

Fréttin birtist fyrst í Fréttablaðinu