Leysa heimsvandamálin í rakarastólnum

„Ég mun sakna allra minna góðu viðskiptavina,“ segir Sigurpáll Grímsson, hárskerameistari og eigandi Rakarastofunnar Klapparstíg, en stofunni verður lokað um næstu mánaðamót eftir 99 ára rekstur. Við sama tilefni mun hann leggja skærin á hilluna eftir 50 ára feril.

Rakarastofan Klapparstíg var stofnuð árið 1918 og er því eitt elsta fyrirtæki landsins. Stofan hefur verið í rekstri við Klapparstíg í 99 ár.

Sigurpáll Grímsson tók við rekstri hennar árið 1967. Hann hefur nú selt húsnæðið við Klapparstíg en veit ekki til þess hvers konar rekstur tekur þar við. Sigurpáll ætlar sökum aldurs að setjast í helgan stein þegar stofan lokar eftir tvær vikur en hann verður 72 ára á þessu ári.

„Það sækir auðvitað að mér af og til efi. En ég er búinn að taka þessa ákvörðun og setja á þetta dagsetningu þannig að þetta er bara komið,” segir Sigurpáll.

Fjölbreytt starf

Hann segir starfið krefjandi, þá sérstaklega líkamlega enda þurfi sterka beinabyggingu til að standa lengi við stólinn.

Þetta er krefjandi starf eins og þú segir en hvað er það skemmtilegasta við að vera rakari?

„Það er eiginlega bara fjölbreytileikinn Maður veit í raun aldrei hvernig dagurinn verður,” segir Sigurpáll.

Viðskiptavinur í 79 ár

Hann segir að hann muni sakna mest allra sinna góðu viðskiptavina. Einn þeirra leit við í morgun en hann hefur verið fastakúnni Sigurpáls í 30 ár.

Það hlýtur nú að vera svolítið erfitt að kveðja viðskiptavini sem eru búnir að vera lengi hjá þér?

„Jú það er það. Það var einn hérna í stólnum hjá mér í vikunni sem leið, háaldraður. Hann sagði að hann væri búinn að vera viðskiptavinur á Rakarastofunni Klapparstíg síðan 1938,” segir Sigurpáll.

Pólitíkin rædd og leyst í stólnum

Og viðskiptavinirnir eru eins misjafnir og þeir eru margir – sumir ræða við hann á mjög persónulegum nótum á meðan aðrir vilja ræða daginn og veginn. Og svo er það pólitíkin.

„Sko málið er það að heimspólitíkin og pólitíkin hérna heima eru leyst hérna í þessum rakarastól. Og það er sko enginn vandi að leysa þessi vandamál í stólnum. En það getur orðið svolítið verra að framkvæma hugmyndirnar,” segir Sigurpáll.