Kvöldfréttir Stöðvar 2: Ræðir upplifun sína af geðdeild og hættulegt ástand í geðheilbrigðismálum

Gunnar Hrafn Jónsson, þingmaður Pírata, tók sér tímabundið leyfi frá þingstörfum vegna þunglyndis sem tók sig illa upp rétt fyrir jól. Gunnar Hrafn hefur síðan lagst inn á geðdeild og verið útskrifaður.

Í kvöldfréttum Stöðvar 2 í kvöld koma Gunnar Hrafn og framkvæmdastjóri geðsviðs,

María Einisdóttir, í myndverið og ræða ástandið í geðheilbrigðismálum í landinu – sem Gunnar Hrafn lýsir sem glötuðu ástandi.

Hann ritaði grein í Fréttablaðið um helgina sem bar yfirskriftina Upplifun mín af geðdeild, þar sem hann spurði áleitinna spurninga um stöðu geðheilbrigðismála á Íslandi og sagði ómögulegt ástand í þeim efnum þinginu að kenna.

„Skítt með flokkspólitík, skítt með rifrildi um peninga, skítt með allt saman þangað til að við sem sitjum á Alþingi getum raunverulega horft í spegil og sagt að við höfum gert allt sem í okkar valdi stóð til að bjarga þessu vanrækta fólki frá dauða og glötun,“ ritaði Gunnar Hrafn.

Gunnar Hrafn veitti fréttastofu Stöðvar 2 viðtal, um það leyti sem veikindin voru að taka sig upp, þann 21. desember síðastliðinn, þar sem hann veitti fólki fágæta innsýn inn í gríðarlega erfiðan sjúkdóm.

Sjá einnig: Gunnar Hrafn tjáir sig um veikindin: Þessi sjúkdómur er tabú

Kvöldfréttir Stöðvar 2 hefjast að vanda, á slaginu 18.30