Sóttu slasaðan skipverja

Þyrla Landhelgisgæslunnar var kölluð út laust fyrir klukkan fjögur í dag vegna manns sem hafði slasast á hendi um borð í loðnuveiðiskipinu Víkingi AK-100. Maðurinn var ekki talinn mjög alvarlega slasaður en vissara þótti að senda þyrluna eftir honum.

Í tilkynningu frá gæslunni segir að skipið hafi verið á miðunum um tuttugu sjómílur norðvestur af Svörtuloftum, yst á Snæfellsnesi. Þyrlan hafi farið í loftið um klukkan hálf fimm og verið komin um fjörutíu mínútum síðar að skipinu.

Um stundarfjórðung tók að koma skipverjanum um borð í þyrluna en aðstæður á vettvangi voru góðar. Þyrlan, TF-LÍF, lenti við Landspítalann í Fossvogi nú um sexleytið.