„Fólk er rosalega fegið að vera komið aftur í vinnu"

Líf er að færast í fiskvinnustöðvar landsins eftir að skipafloti útgerðanna hélt út til veiða á sunnudag. Rekstrarstjóri hjá Vísi hf. í Grindavík segir starfsfólkið fegið að vera komið aftur til vinnu.

Verkfall sjómanna hafi mest áhrif á störf landverkafólks en nú er verkfalli lokið og búið að kalla landverkafólk aftur til starfa, þar sem skipin eru komin á miðin. Á morgun verða færiböndin full af fiski.

Hjá Vísi í Grindavík í morgun voru starfsmenn að undirbúa komu tveggja línubáta, Kristínu GK og Sighvati GK, sem væntanleg eru til hafnar klukkan sex í fyrramálið með um hundrað og þrjátíu tonn af ferskum þorski og ýsu.

„Það var rosalega ljúf tilfinning að þetta tíu vikna stopp var búið. Þetta er búið að vera erfiður tími og í rauninni allir sem eru búnir að bíða eftir að eitthvað mundi fara að gerast þannig að þetta er mikil léttir. Nú bíður starfsfólk jafnt sem vélar eftir því að byrja,“ sagði Jóhann Helgason, rekstrarstjóri hjá Vísi hf. Í Grindavík

Fimm bátar sem eru í eigu Vísis fóru strax til veiða eftir að verkfalli sjómanna var aflýst á sunnudagskvöld og segir Jóhann að veiði hafi gengið vel.

Um hundrað og fimmtíu manns starfa við landvinnslu hjá fyrirtækinu og þegar var hafist handa við að hringja í þá og fá þá til vinnu.

„bara mikil tilhlökkun hjá öllum starfsmönnum að snúa aftur til vinnu. Allir orðnir dauðleiðir á að hanga heima og gera ekki neitt,“ sagði Jóhann.

Þegar líða tók á verkfallið höfðu vinnslustöðvar víðs vegar um landið áhyggjur af því að missa frá sér starfsfólk í önnur störf en Jóhann segir að flestir þeirra starfsmanna snúi til baka og þegar fréttastofu bar að garði í morgun voru margir starfsmenn landvinnslunnar að líta við.

„Við erum bara rosalega ánægðir með endurheimtur á starfsfólki og meira og minna allir okkar starfsmenn komu til baka,“ segir Jóhann.

Jóhann segir að verkfallið hafi haft mikil áhrif á starfsemi Vísis.

„Það er dýrt að vera með vélbúnað og vinnslu og fastan kostnað sem fer ekki neitt,“ segir Jóhann.

Og það gæti orðið erfitt að komast inn á markaðinn aftur en eitt sterkasta einkenni Íslendinga er stöðugt framboð á vöru allt árið um kring

„Þegar það gengur ekki upp þá missum við traust on núna fer af stað mikil vinna í að endurvinna það traust aftur,“ sagði Jóhann.