Fá ekki 300 milljónir úr 15 milljarða króna ofanflóðasjóði

„Við þurfum 300-400 milljónir á ári til að fara í þessar tvær framkvæmdir sem eftir eru. Það er ekki mikið miðað við stöðu sjóðsins,“ segir Páll Björgvin Guðmundsson, bæjarstjóri Fjarðabyggðar, en á bæjarráðsfundi sveitarfélagsins var lögð fram bókun um að ekki sé nægt fjármagn á fjárlögum til þess að halda áfram byggingu ofanflóðamannvirkja í Neskaupstað.

Í bókuninni segir að bæjarráð telji það mjög mikilvægt að þessum framkvæmdum verði haldið áfram með tilliti til öryggis íbúa. Mörg rök séu fyrir því, meðal annars að nægt fé er í sjóðnum eða um 15 milljarðar króna. Hafsteinn Pálsson, starfsmaður sjóðsins og umhverfisráðuneytisins, staðfesti stærðargráðuna. Sjóðurinn er geymdur á reikningi og í hann fer meira en tekið er út. Hann er fjármagnaður með því að árlegt gjald er lagt á allar brunatryggðar húseignir og er upphæðin 0,3 prómill af vátryggingarverðmæti.

Hafsteinn bendir á að fjárheimildir sjóðsins séu ákveðnar af Alþingi. Ekki megi nýta fjármuni sjóðsins nema sem nemur þeirri upphæð sem Alþingi ákveður.

Á bæjarráðsfundinum voru lögð fram afrit af bréfum Páls til þingmanna Norðausturkjördæmis, fjárlaganefndar Alþingis, fjármálaráðherra og umhverfis- og auðlindaráðherra, en hann hefur einnig fundað með ráðherrum vegna málsins. „Svörin sem við höfum verið að fá eru að þetta sé þensluhvetjandi og hluti af útgjaldaramma ríkisins. 

Það sem við höfum verið að benda á er tvennt. Annars vegar að þetta sé bundið í lög og snúist um öryggi fólks og hins vegar að við höfum verið í framkvæmdum. Það er mikilvægt að það sé samfella í svona verkum. Að það sé ekki verið að byrja upp á nýtt. Það eru verktakar hér að vinna í þessu og þeir gætu séð hag sinn í að bjóða í verkið sem væri hagur fyrir sveitarfélagið og sjóðinn.

Þetta eru ekki peningar sem eru að fara í heilbrigðismál eða vegakerfið eða neitt slíkt. Þetta snýst um að nýta peningana sem eru ætlaðir beint í svona verkefni, tekna úr sérstökum sjóði,“ segir Páll.

Hann bendir á að verkin tvö séu tilbúin undir hönnun og búið sé að framkvæma umhverfismat. „Við fylgjum þessu máli eftir og vonandi eigum við góð samskipti áfram við stjórnvöld því það er mikilvægt að klára málið.“

Fréttin birtist fyrst í Fréttablaðinu.