Bjarni segir Ólöfu hafa haft hlýja nærveru og skarpa sýn

Fjölmenni var við útför Ólafar Nordal fyrrverandi innanríkisráðherra og varaformanns Sjálfstæðisflokksins í Dómkirkjunni í dag. Forsætisráðherra segir Ólöfu hafa haft hlýja nærveru, skarpa sýn og vilja til að vinna að framförum fyrir landið,  fyrir fólk, með fólki.

Ólöf Nordal fæddist í Reykjavík hinn 3. desember árið 1966 og lést hinn 8. febrúar eftir rúmlega tveggja ára baráttu við krabbamein. Fullt var út úr dyrum í Dómkirkjunni í dag en gestir gátu einnig fylgst með útförinni á skjá í Iðnó og í Odfellow húsinu.

Fjölmargir minnast Ólafar í minningargreinum í fjórum opnum í Morgunblaðinu í dag. Þeirra á meðal er Bjarni Benediktsson forsætisráðherra. Hann segir Ólöfu  ósjaldan hafa minnt hann á nauðsyn þess að tala við fólkið í flokknum.

„Hún lagði ávallt áherslu á að vera aðgengileg og í góðum tengslum við þá sem hún starfaði fyrir. Um leið var hún óhrædd við að taka skýra afstöðu og tala fyrir henni, skýra málin fyrir fólki. Sótti frekar í en forðaðist þá sem hún vissi að voru efins eða annarrar skoðunar. Þetta átti ekki síst við þegar mikið lá við og fólk kallaði eftir því að ræða stöðu landsmálannaf,“ segir Bjarni í minningargrein sinni.

Ólöf hafi búið yfir mannkostum sem ekki væru auðfundnir, haft hlýja nærveru, skarpa sýn og viljann til að vinna að framförum fyrir landið með fólki og fyrir fólk..  

Séra Sveinn Valgeirsson jarðsöng og fjöldi tónlistarmanna flutti tónlist við athöfnina. Forsætisráðherra bar kistu Ólafar úr kirkju ásamt Ögmundi Skarphéðinssyni, , Gunnari Haraldssyni, Ingibjörgu Jóhannsdóttur, Jóni Gunnarssyni Áslaugu Örnu Sigurbjörnsdóttur, Mörtu Nordal og Ásthildi Sturludóttur.

Fyrir utan kirkjuna stóðu ungir sjálfstæðismenn heiðursvörð með íslenska fánaborg og sýndu þar með hinstu virðingu fyrir Ólöfu Nordal sem naut mikillar virðingar og trausts innan Sjálfstæðisflokksins og raunar langt út fyrir raðir hans.