Var sagður hafa notað kreditkort skáta í eigin þágu

Í niðurstöðu bráðabirgðaskýrslu löggilts endurskoðanda Bandalags íslenskra skáta (BÍS) um rannsókn á fjármálum fyrrverandi framkvæmdastjóra BÍS, Hermanns Sigurðssonar, segir að hann hafi meðal annars notað kreditkort skáta í eigin þágu og keypt með því skíðaboga á bíl sinn.

Þá segir í skýrslunni að hann hafi greitt sér hærri dagpeninga en reglur ríkisskattstjóra segja til um og greitt sér hærri laun en honum var heimilt samkvæmt ráðningarsamningi.

Einnig segir að Hermann hafi greitt sér þrettánda mánuðinn í október 2015. Í ráðningarsamningi var sagt að hann ætti rétt á þeim bónus í lok árs.

Hermanni var vikið úr starfi í desember síðastliðnum og var ástæðan sögð trúnaðarbrestur á milli hans og meirihluta stjórnar bandalagsins. Á lokuðum fundi forystu skátafélaga á landinu kom fram að hluti af trúnaðarbrestinum tengdist fjárreiðum framkvæmdastjórans fyrrverandi.

Á þeim fundi voru fyrrgreindar niðurstöður kynntar. Var þá samþykkt að frekari rannsókn færi fram á fjárreiðum framkvæmdastjórans. Þeirri rannsókn á að ljúka fyrir aðalfund skátahreyfingarinnar, skátaþing, sem fer fram þann 11. mars næstkomandi.

Bragi Björnsson, þáverandi skátahöfðingi BÍS, vildi ekki tjá sig um málið þegar Fréttablaðið náði tali af honum. Hann staðfesti þó að hann hefði sjálfur lagt til að framkvæmdastjóranum yrði sagt upp vegna gruns um óeðlilega fjársýslu.

Bragi sagði sjálfur af sér í janúar vegna deilna um forystu skátastarfs í landinu.

Hermann vildi ekki tjá sig um ásakanirnar en vísaði á stjórn BÍS.

„Ég má ekki tjá mig um mál einstakra félagsmanna,“ segir Heiður Dögg Sigmarsdóttir, formaður upplýsingaráðs Bandalags íslenskra skáta, aðspurð um mál Hermanns.



Uppfært klukkan 15:24

Stjórn Bandalags íslenskra skáta hefur sent frá sér tilkynningu vegna umfjöllunar um málið. Hana má lesa hér að neðan:

Stjórn Bandalags íslenskra skáta (BÍS) vill koma eftirfarandi á framfæri vegna umræðu í fjölmiðlum um meint fjármálamisferli fyrrverandi framkvæmdastjóra hreyfingarinnar. Í kjölfar uppsagnar fyrrverandi framkvæmdastjóra tók stjórn BÍS ákvörðun um að fá óháðan aðila til að rannsaka fjárreiður BÍS. Þeirri vinnu er ekki lokið, en samkvæmt bráðabirgðarskýrslu löggilts endurskoðanda liggur fyrir að ekkert bendi til þess að um saknæmt athæfi að ræða hvað varðar fjársýslu fyrrverandi framkvæmdastjóra. Niðurstöður bráðabirgðarskýrslunnar voru kynntar af viðkomandi endurskoðanda á félagsforingjafundi sem haldin var þann 14. janúar síðastliðinn. Á fundinum ítrekaði endurskoðandinn að hann teldi ekki, á grundvelli þeirra gagna sem lægju fyrir, að um neitt saknæmt athæfi væri að ræða af hálfu fyrrverandi framkvæmdastjóra. Á félagsforingjafundinum gafst öllum hlutaðeigandi tækifæri til að tjá sig um málið og náðist ákveðin sátt um deilumálin, meðal annars um fjármál fyrrverandi framkvæmdastjóra.fundarins. Framundan er aukaskátaþing og svo kjör nýs skátahöfðingja.