Ekki til fé til að greiða sauðfjárbændum næsta haust

Svo gæti farið að afurðastöðvar hefðu ekki fjármagn til að staðgreiða innlegg sauðfjárbænda í næstu sláturtíð. Síðustu tvö ár hafa verið erfið fyrir sláturleyfishafa í sauðfjárrækt. Bændur eru áhyggjufullir yfir komandi vetri.

Þetta kom fram í máli Ágústs Andréssonar, yfirmanns afurðastöðvar Kaupfélags Skagfirðinga, á aðalfundi Félags sauðfjárbænda í Skagafirði sem haldinn var fyrir skömmu. Ræddu bændur þar stöðuna sem er orðin nokkuð strembin.

Ágúst segir það rétt að hann hafi viðrað erfiða stöðu afurðastöðva á fundinum. Staðan væri þannig nú að eitthvað þyrfti að gera. „Á þessum fundi sagði ég að afurðastöðvar margar hverjar gætu ekki staðgreitt innlegg bænda að fullu í haust. Því þyrfti að koma til þess að sláturhúsin greiddu til bænda hluta af innleggi þeirra og síðan væri hægt að greiða þeim fyrir hinar afurðirnar þegar væri ljóst með sölu á þeim,“ segir Ágúst. Framleiðsla á lambakjöti er rúmlega 3.500 tonnum meiri en innanlandsneyslan. Með sterku gengi krónunnar hefur verð fyrir afurðirnar hríðfallið og því erfitt um vik að selja á vel borgandi markaði erlendis.

Merete Rabölle, formaður Félags sauðfjárbænda í Skagafirði, segir bændur áhyggjufulla yfir stöðunni. „Auðvitað erum við áhyggjufull. Staða krónunnar er að sliga allan útflutning. Það verður erfitt fyrir okkur ef á að lækka afurðaverðið til okkar aftur eins og var gert í fyrra,“ segir Merete.

Ágúst segir minni skrokka vera auðveldari söluvöru eins og staðan er núna. Einnig sé betra ef hægt er að minnka fallþunga skrokkanna og létta þannig af afurðastöðvum á meðan farið er í gegnum þennan brimskafl. „Við höfum alltaf sagt þetta vera tímabundið ástand. Ef hægt er að slátra fyrr en ella og minnka þannig magnið gætum við komist vel í gegnum þetta. Hins vegar samrýmist það ekki ræktunarmarkmiðum en við lítum á þetta sem tímabundið ástand.“ 

Fréttin birtist fyrst í Fréttablaðinu