Skaðleg drykkja hjá helmingi íslenskra karla

Nálægt annar hver karlmaður og þriðja hver kona á aldrinum 18–34 ára er með skaðlegt neyslumynstur áfengis. Þetta eru niðurstöður könnunar sem Gallup framkvæmdi fyrir Embætti landlæknis. Könnunin fór fram sex síðustu mánuðina í fyrra.

Þegar spurt var um ölvunardrykkju, þ.e. neyslu á fimm áfengum drykkjum eða meira á einum degi, sögðust um 38 prósent karla drekka sig ölvaða einu sinni í mánuði eða oftar og um 23 prósent kvenna. Ef þetta hlutfall er heimfært upp á þjóðina alla má gera ráð fyrir að um 48 þúsund karlmenn og 29 þúsund konur, 18 ára og eldri, hafi drukkið sig ölvaða einu sinni í mánuði eða oftar, að því er segir á vef landlæknisembættisins.

Árið 2016 reyktu um 10% landsmanna daglega. Er það lítil breyting frá árinu 2015, en árið 2014 reyktu um 14 prósent daglega samkvæmt vöktun embættisins á áhrifaþáttum heilbrigðis.

Ef tekið er mið af landsmönnum öllum þá þýðir þetta að um 8.000 færri reyktu árið 2016 heldur en 2014.

Dagleg notkun 18 til 69 ára á rafsígarettum mældist um 3% árið 2016, sem gerir um sex þúsund manns sé tekið mið af þjóðinni allri. Um sjö prósent karla notuðu tóbak í vör daglega.

Úrtakið var 8.000 einstaklingar af öllu landinu, 18 ára og eldri, valdir af handahófi úr viðhorfahópi Gallup og úr þjóðskrá. Þátttökuhlutfall var 57,6 prósent. 

Fréttin birtist fyrst í Fréttablaðinu