Lagt til að kennitöluflakkarar verði settir í atvinnurekstrarbann

Samtök atvinnulífsins og Alþýðusamband íslands kynntu í dag sameiginlegar tillögur sem ætlaðar eru til að berjast gegn kennitöluflakki.

Kennitöluflakk er þegar félag hættir starfsemi eftir gjaldþrot en rekstur heldur áfram í gegnum annað félag með nýrri kennitölu til að komast undan lagalegum skuldbindingum.

Ætla má að tjón vegna kennitöluflakks hlaupi á milljörðum króna á hverju ári.

Samkvæmt ástralskri rannsókn ber ríkissjóður þriðjung tjónsins, starfsmenn 11 prósent en önnur fyrirtæki 55 prósent.

Íslensk rannsókn frá árinu 2005 sýnir að 73% íslenskra fyrirtækja hafa orðið fyrir tjóni vegna kennitöluflakks.

„Við erum að stíga sameinuð fram til að berjast gegn þessari meinsemd í samfélaginu. Við viljum að íslenskt lagaumhverfi verið uppfært og geri svipaðar breytingar og gerðar voru á Norðurlöndunum og víðs vegar í Vestur-Evrópu á 10. áratug síðustu aldar. Leikreglur á Íslandi eiga að vera sambærilegar við það sem gerist í nágrannalöndum okkar," segir Halldór Benjamín Þorbergsson, framkvæmdastjóri Samtaka atvinnulífsins.

Lagt er til að ríkisskattstjóri geti úrskurðað kennitöluflakkara í atvinnurekstrarbann - að þeim verði bannað að eiga og reka hluta- og einkahlutafélög í allt að þrjú ár.

Á árunum 2008 til 2015 komu 202 framkvæmdastjórar við sögu í þremur eða fleiri gjaldþrotum á Ísland og 481 stjórnarmenn.

Alþýðusambandið hefur lengi barist fyrir málinu en ekki hefur áður náð samstaða um tillögur þeirra. Gylfi Arnbjörnsson, forseti ASÍ, bendir á tillögur frá árinu 2011 sem fengu ekki framgang. En nú stíga atvinnurekendur og launamenn saman fram.

„Ég vænti þess að nú verði auðveldara að eiga við stjórnvöld, þar sem það er búið að slípa kantana af þessu," segir Gylfi.

Halldór tekur undir orð hans. 

„Næsta skref verður stigið af löggjafanum. Þar liggur boltinn. Ég tel okkur hafa lagt sannfærandi rök fram og SA mun ekki láta sitt eftir liggja til að þetta mál geti orðið að lögum á þingi.“