Segir Viðreisn lítilþæga í stjórnarsamstarfinu

Ásta Guðrún Helgadóttir, þingmaður Pírata, segir stefnu ríkisstjórnarinnar í utanríkismálum stangast gersamlega á við allt það sem Viðreisn stendur fyrir.

„Ég innti formann utanríkismálanefndar og varaformann Viðreisnar um það hvort þessi stefna sem birtist í skýrslunni um utanríkismál væri ásættanleg utanríkisstefna fyrir Viðreisn?“ segir Ásta Guðrún á Facebooksíðu sinni nú fyrir skemmstu.

Nokkurs titrings virðist gæta í stjórnarsamstarfinu vegna skýrslu Guðlaugs Þórs Þórðarsonar utanríkisráðherra og svo ummæla þess efnis að Ísland sé blessunarlega laus við alla óra um Evrópusambandsaðild. Ein helsta forsenda þess að Viðreisn var stofnuð á sínum tíma var andstaða við það þegar Gunnar Bragi Sveinsson, þá utanríkisráðherra, sleit einhliða aðildarviðræðum við ESB. Sá gjörningur kallaði fram fjöldamótmæli við Alþingishúsið og umfangsmikla undirskriftasöfnun á vegum samtakanna Já Ísland, sem Jón Steindór Valdimarsson, nú þingmaður Viðreisnar, leiddi.

Viðreisn áhugalaus um Evrópu

Ásta Guðrún gefur í sjálfu sér ekki mikið fyrir óánægjuraddir innan Viðreisnar með skýrsluna, frekar að það sé í nösunum á þeim þó það varði sjálfan tilverugrundvöll flokksins. Á þingi sagði hún að um stór álitaefni væri að ræða sem ekki væri heil brú í innan ríkisstjórnarinnar.

„Utanríkisstefna sem byggir á því að viðhalda núverandi status-quo í Evrópumálum. Eftir því sem ég best skildi þá er það bara í lagi - fyrir flokk sem eitt helsta baráttumál var að setja Evrópu á oddinn fyrir síðustu kosningar. Það er ekkert í þeim gögnum frá utanríkisráðuneytinu, skýrslu um utanríkismál eða fjármálaáætlun sem bendir til þess að Viðreisn ætli að setja Evrópu á oddinn.“

Óbreytt ástand í Evrópumálum

Þá segir Ásta Guðrún jafnframt engin merki um að styrkja eigi sendiráð Íslands í Brussel til þess að gæta hagsmuna Íslands innan EES. „Það fékkst ekki einu sinni fjármagn til þess að bæta við einu stöðugildi í London til að fylgjast með og gæta hagsmuna Íslands gagnvart Brexit, heldur þurfti að finna það fjármagn með hrókeringum á kostnað viðveru okkar í Strassborg.“

Niðurstaðan, að mati Ástu Guðrúnar, er óbreytt ástand og það dugi fyrir Viðreisn. „Ef marka má formann utanríkismálanefndar og varaformann Viðreisnar. Status quo í Evrópumálum er líka nóg ef marka má fjármálaáætlun formanns Viðreisnar og fjármálaráðherra. Ef Status quo í Evrópumálum er nóg - hver er þá raunverulegur munurinn á milli hægri flokkanna í ríkisstjórn?“ spyr þingmaður Pírata.