Bakaranemum fækkar og þeir fá ekki samning

Nemum í bakaraiðn hefur snarfækkað og gengur erfiðlega fyrir þá að komast á samning um verknám, segir Ásgeir Þór Tómasson, fagstjóri baksturs í Menntaskólanum í Kópavogi.

Hann segir það mjög sveiflukennt hvað menn hafa verið duglegir að taka að sér nema. „Þetta hefur stjórnast svolítið af því sem hefur verið að gerast á markaðnum,“ segir Ásgeir Þór. Hann segir ýmislegt hafa gerst sem hafi verið óheppilegt fyrir bakarísrekstur. „Haustið 2008 hækkaði hráefnið upp úr öllu valdi og menn héldu að sér höndum. Vildu ekki vera að gera samninga um eitt eða neitt þegar þeir vissu ekki hver staðan yrði. Menn eru ennþá hægt og rólega að byrja að taka nema aftur,“ segir Ásgeir Þór og bætir við að sum bakarí séu að taka einn eða tvo nema á ári en gætu verið með fjóra eða fimm. Hið jákvæða sé að upp á síðkastið hafi nokkrir ungir bakarar sótt sér meistaraleyfi til að geta tekið nemendur á samning.

Ásgeir Þór segir að fyrir fimmtán til tuttugu árum hafi verið í kringum 75 nemendur í iðngreininni víðsvegar um landið. Núna sé fjöldinn kominn niður í 20 eða 25. „Það er því ekki stór hópur af fólki sem er að læra þessa iðn,“ segir hann. Síðan hafi Myllan keypt Samsölubakarí. Bæði þessi bakarí hafi tekið til sín dágóðan fjölda nema en upp á síðkastið hafi Myllan ekki tekið neina nemendur. „Það munar talsvert um það þegar tvö fyrirtæki sameinast í eitt og eru svo ekkert að sinna því að mennta fólk í þessu fagi,“ segir hann.

Hilmar Harðarson, formaður Samiðnar, segir fleiri iðngreinar glíma við sama vanda og bakarar. „Það var mjög slæmt ástand upp úr hruni. En það hefur skánað talsvert,“ segir hann. Hann segir ástandið hafa verið erfitt í hárgreiðslu, snyrtifræði og öðrum greinum. „Auðvitað vill maður sjá að að atvinnurekendur séu duglegir við að taka nemana vegna þess að við fáum ekki útlærða iðnaðarmenn nema nemarnir fái nemapláss,“ segir hann.