Óttast að Aflið gleymist í asa við fjárlagagerðina

Líklegt er að í ár nýti metfjöldi einstaklinga sér þjónustu Aflsins á Akureyri, samtaka gegn kynferðis- og heimilisofbeldi á Norðurlandi. Skjólstæðingum hefur stöðugt fjölgað frá árinu 2011. Verkefnastjóri Aflsins er hræddur um að félagið gleymist í hasarnum við fjárlagagerð nýrrar ríkisstjórnar.

„Við erum örlítið á varðbergi núna. Síðustu tvö árin höfum við fengið framlög frá ríkinu. Hins vegar hefur því verið háttað þannig að okkur hefur verið ýtt yfir línuna í blálokin á fjárlagagerðinni. Nú er komin ný ríkisstjórn sem vinnur hlutina í miklum flýti og því óttumst við það versta en vonum að við gleymumst ekki í hasarnum,“ segir Hjalti Ómar Ágústsson, verkefnastjóri Aflsins. „Við vitum ekki á þessari stundu hvort við fáum framlög á næsta ári og því erum við að leita að fjármagni til að reka okkur. Það er mjög erfitt að vera í svona óvissu þegar áramót eru handan við hornið.“

Starfsemi Aflsins byggir á einkaviðtölum, hópavinnu og forvörnum. Hjalti segir fjölda skjólstæðinga Aflsins sýna vel hversu mikil þörf sé fyrir Aflið. „Hópurinn sem leitar til okkar stækkar sífellt. Við ræddum við fyrrverandi velferðarráðherra áður en stjórnin sprakk og vonandi er hægt að taka upp samtalið við Ásmund Einar eftir áramót,“ segir Hjalti Ómar.

„Ég man eftir þessu máli frá því ég var í fjárlagavinnunni. Ég er enn að setja mig inn í málaflokkana en ég get með vissu sagt að ég hugsa hlýlega til starfsemi Aflsins á Akureyri. Við þurfum síðan að skoða betur á næstu dögum hvernig unnið verður úr stöðunni,“ segir Ásmundur Einar Daðason, nýr ráðherra velferðarmála.