Nicky Butt fær nýtt starf hjá Manchester United

Nicky Butt hefur fengið krefjandi og ábyrgðarmikið starf hjá Manchester United en eigendur United hafa ráðið hann sem yfirmann knattspyrnuakademíu félagsins.

Nicky Butt er 41 árs gamall og úr hinum fræga 1992-árgangi Manchester United sem tók yfir United-liðið á sínum tíma.

Butt spilaði alls 387 leiki fyrir félagið á árunum 1992 til 2004. Hann snéri aftur til Manchester United árið 2012 og hefur síðan þjálfað bæði varaliðið og 19 ára liðið.

„Nicky hefur hefðir og arfleið félagsins í blóðinu. Það lá í augum uppi að ráða hann," sagði varastjórnarformaðurinn Ed Woodward.

„Þetta er mikill heiður fyrir mig að fá tækifæri til að stýra knattspyrnuakademíu félagsins og innræta réttu gildin og rétta hugarfarið meðal framtíðar kynslóða af leikmönnum  Manchester United," sagði Nicky Butt við BBC.

Manchester United hefur stokkað upp í unglingastarfi félagsins og hófst það þegar Brian McClair hætti sem yfirmaður knattspyrnuakademíunnar í júní 2015.

United segir þó að það sé ekki hægt að bera starf Butt saman við það sem Brian McClair sinnti vegna þess að félagið sé búið að endurskipuleggja allt starfið hjá sér.

Ed Woodward er á því að Butt komi inn með "ástríðu, orku og reynslu" í starfið eins og hann orðaði það sjálfur.

Undanfarin fjögur ár hafa fimmtán leikmenn úr unglingastarfi Manchester United spilað samtals 173 leiki með aðalliðinu. „Klúbburinn er mjög stoltur af þeirri tölfræði," sagði Ed Woodward.

Nicky Butt varð sex sinnum enskur meistari með Manchester United og hann vann einnig Meistaradeildina og spilaði 39 landsleiki fyrir England. Hann var aðstoðarmaður Ryan Giggs þegar Giggs tók við stjórastöðunni í lok 2013-14 tímabilsins eftir að David Moyes var rekinn.