Ræða það að gera miklar breytingar á ensku bikarkeppninni

Enska blaðið Sun slær því upp í morgun að enska knattspyrnusambandið sé að ræða framtíð ensku bikarkeppninnar við æðstu menn hjá ensku úrvalsdeildinni. Markmið viðræðnanna er að fækka bikarleikjum og minnka álagið á bestu liðin á Englandi.

Það hefur verið mikið rætt og skrifað um leikjaálagið í enska boltanum sem þykir meira en í öðrum Evrópulöndum og auðvitað vegur þar þungt að leikmenn fá ekkert frí yfir jól og áramót. Í hinum löndunum er vanalega vetrarfrí sem gefur leikmönnum gott tækifæri til að hlaða batteríin.

The Sun segir frá því að hugmyndir séu uppi um að hætta við að endurtaka leiki í bikarnum verði jafntefli og gera frekar út um þá strax í framlengingu eða vítakeppni.

Þetta myndi gerbreyta ensku bikarkeppninni og væri áfall fyrir minni liðin sem græða oft mikinn pening á þessum endurteknu leikjum á móti stærri klúbbum.

Stóru klúbbarnir eru hinsvegar ekki spenntir fyrir að spila einum leik meira á tímabili þar sem meira en nóg er af leikjum. Þeir fagna því örugglega slíkum breytingum.

Undanúrslit enska deildarbikarsins verða væntanlega bara einn leikur en ekki tveir leikir, heima og að heiman, eins og þetta er í dag.

Möguleiki á að búa til vetrarfrí í enska boltanum gæti einnig verið fyrir hendi verði enski bikarinn leikinn í miðri viku í stað þess að vera spilaður um helgi.

Fyrstu umferðirnar færu þá fram á helgum en um leið og úrvalsdeildarliðin koma inn í keppnina þá verði spilað í miðri viku. Þetta gæti skapað pláss fyrir vetrarfrí í upphafi nýs árs.

Forráðamenn ensku úrvalsdeildarinnar hafa miklar áhyggjur af því að þetta mikla álag á leikmenn þýðir að bestu leikmennirnir vilji frekar spila annarsstaðar í Evrópu. Breytinga er því þörf.