Gömul Newcastle-hetja verður samherji Eggerts hjá Fleetwood

Reynsluboltinn Shola Ameobi er genginn í raðir Fleetwood Town sem leikur í C-deildinni á Englandi. Samningur Ameobi gildir út tímabilið.

Ameobi er þekktastur fyrir tíma sinn hjá Newcastle United en hann lék með liðinu í 14 ár (2000-14). Ameobi, sem á 10 landsleiki að baki fyrir Nígeríu, lék alls 397 leiki fyrir Newcastle og skoraði í þeim 79 mörk.

Með Fleetwood leikur Eskfirðingurinn Eggert Gunnþór Jónsson en hann gekk til liðs við enska liðið frá Vestsjælland í Danmörku fyrir tímabilið.

Eggert, sem hefur verið mikið meiddur undanfarin ár, hefur náð sér vel á strik með Fleetwood í vetur og verið fastamaður í liðinu. Eggert hefur komið við sögu í 21 deildarleik á tímabilinu og skorað tvö mörk.

Fleetwood hefur gengið illa í vetur en liðið er í 21. sæti C-deildarinnar og þar með í fallsæti. Eggert og félagar eiga þó tvo leiki til góða á Shrewsbury Town sem er í sætinu fyrir ofan.

Grétar Rafn Steinsson starfar sem yfirmaður knattspyrnumála hjá Fleetwood.

THERE'S ONLY ONE SHOLA AMEOBI: @ftfc delighted to confirm the signing of former @NUFC striker Shola Ameobi! #codarmy pic.twitter.com/oza9DBMI3k

— Fleetwood Town FC (@ftfc) February 12, 2016