Kokkalandsliðið sýnir afrakstur margra mánaða vinnu í dag

Kokkalandsliðið, sem hefur æft stíft fyrir Ólympíuleikana í matreiðslu undanfarna mánuði, ætlar að leyfa gestum og gangandi að fylgjast með undirbúningnum í Smáralind í dag. Verk dagsins er afar vandasamt en lögð verður sérstök áhersla á útlit réttanna.

Listaverk á matardiskum

Hafliði Halldórsson, framkvæmdastjóri kokkalandsliðsins, segir undirbúninginn hafa staðið yfir í átján mánuði, en liðið heldur út til Þýskalands á mótið 20. október næstkomandi.  „Í dag erum við að sýna aðra keppnisgreinina okkar sem er svokallað kalt sýningarborð eða culinary art á ensku. Það er fjöldi rétta sem eru í raun og veru listaverk á diskum, eða svo ég sletti „extreme“ flott,“ segir Hafliði í samtali við Vísi.  

Maturinn verður með íslensku yfirbragði, að sögn Hafliða. „Maturinn er borinn fram á til dæmis diskum sem hannaðir eru í kringum réttinn, sem er íslensk smíð og hönnun. Það verður íslenskur steinn, viður, silfur og ýmislegt annað. Þetta er mikið sjónarspil og gríðarlega fallegt.“

Landsliðið þarf að flytja réttina á milli staða og til þess að þeir haldi fullkomnu útliti sínu verða þeir húðaðir með matarlími. Þeir verða því ekki ætir. „Þeir þurfa að standa á borði í heilan dag, í hitanum, og þar með er orðið óhæft að borða þá. En að sjálfsögðu er þetta allt saman alvöru matur sem unnið er með á sérstakan hátt,“ segir Hafliði.

Fimm sólarhringa ferli

Aðspurður segir hann það taka allt að fimm sólarhringa að útbúa kalda borðið, sem verður til sýnis í Smáralind í dag. „Það eru nokkur handtökin á bak við þetta en þróunin tók eitt og hálft ár.“

Íslenska kokkalandsliðið er með þeim bestu í heimi, eða á sjötta sæti lista yfir bestu kokkalandslið heims. Hafliði segir að mikill spenningur sé fyrir mótinu  og hvetur hann alla til þess að fylgjast með liðinu í Smáralind í dag.

Ólympíuleikarnir í matreiðslu, IKA Culinary Olympics, er stærsta matreiðslukeppni landsliða í heiminum og jafnframt sú mest krefjandi. Keppnin á sér yfir 100 ára sögu og er haldin á fjögurra ára fresti. Í keppninni mætast margir af færustu kokkum heims frá um 50 löndum. Liðin koma með hluta af hráefni með sér að heiman, auk ýmissa tækja og tóla sem þarf á keppnisstað. Keppt er í tveimur greinum, köldu borði og heitum mat. Það lið sem nær hæstu samanlögðum stigum verður Ólympíumeistari.