Welbeck hetja Arsenal gegn Leicester í ótrúlegum leik | Sjáðu mörkin

Arsenal vann Leicester, 2-1, í ótrúlegum leik í ensku úrvalsdeildinni í knattspyrnu í dag en leikurinn fór fram á Emirates-vellinum í London.

Arsenal byrjaði leikinn vel og réði liðið lögum og lofum á vellinum nánast allan fyrri hálfleikinn. Það skiptir ekki alltaf máli í knattspyrnu og náði Jamie Vardy að skora fyrsta mark leiksins úr vítaspyrnu rétt undir lok fyrri hálfleiksins.

Í upphafi síðari hálfleiksins fékk Danny Simpson, leikmaður Leicester, tvö gul spjöld með stuttu millibili og fékk að fjúka af velli.

Theo Waltcott jafnaði síðan metin tuttugu mínútum fyrir leikslok með frábæru marki eftir laglegt uppspil heimamanna. Allt stefndi í 1-1 jafntefli en hetja dagsins var Danny Welbeck sem kom inn á rétt undir lok leiksins.

Hann hafði ekkert komið við sögu hjá Arsenal á tímabilinu vegna meiðsla en drengurinn tryggði Arsenal sigurinn með marki úr skalla á 95. mínútu leiksins. Ótrúlegur endir. Arsenal minnkaði því forskot Leicester niður í tvö stig í toppbaráttunni.

Jamie Vardy skorar fyrir Leicester Walcott jafnar Welbeck skorar fyrir Arsenal