Wenger óttaðist um titilvonir Arsenal

Arsene Wenger, stjóri Arsenal, leist ekkert á blikuna þegar Leicester komst yfir í leik liðanna í ensku úrvalsdeildinni um helgina.

Sigur Leicester hefði þýtt að spútnikliðið hefði náð átta stiga forystu á Arsenal og verið í lykilstöðu í titilbaráttunni.

En Arsenal náði að koma til baka og vinna dramatískan 2-1 sigur þökk sé sigurmarki varamannsins Danny Welbeck í uppbótartíma.

Sjá einnig: Welbeck hetja Arsenal gegn Leicester í ótrúlegum leik

Leicester er enn á toppnum en nú með tveggja stiga forystu á bæði Arsenal og Tottenham, sem vann 2-1 sigur á Manchester City í gær.

„Tap hefði verið hræðilegt. Allt umtal hefði verið neikvætt og trúin hjá mönnum hefði minnkað. Það hefði verið mun erfiðara að berjast um titilinn,“ sagði Wenger.

„Við hefðum ekki gefist upp en það þarf þrjá leiki til að vinna upp átta stiga mun. Þetta var strax mun skárra þegar við jöfnuðum leikinn og munurinn varð aftur fimm stig.“

Hann var vitanlega hæstánægður með sigurmark Welbeck og segir að hans menn hafi átt það skilið miðað við framlag þeirra í leiknum.

„Við eigum möguleika og við skulum sjá til. Við höfum nú unnið tvo leiki í röð eftir fjóra leiki í röð án sigurs. Það er frábært að við eigum enn möguleika þrátt fyrir svo slæman kafla.“