Suður stúkan á Old Trafford verður nefnd eftir Sir Bobby Charlton

Ákveðið hefur verið að nefna Suður stúkuna á Old Trafford, heimavelli Manchester United, í höfuðið á Sir Bobby Charlton.

Nýja nafnið á stúkunni verður afhjúpað fyrir leik United og Everton á Old Trafford 2. apríl næstkomandi. Fimm ár eru liðin frá því Norður stúkan var nefnd eftir Sir Alex Ferguson, fyrrverandi knattspyrnustjóra United.

Charlton er goðsögn á Old Trafford en hann lék 758 leiki með United á árunum 1956-1973 og skoraði 249 mörk. Charlton er enn markahæsti leikmaður í sögu félagsins en Wayne Rooney vantar aðeins fimm mörk til að jafna met hans. Ekki langt er langt síðan Rooney sló markamet Charltons með enska landsliðinu.

Charlton hefur verið stjórnarmaður hjá United frá 1984 og er enn fastagestur á leikjum liðsins.

Suður stúkan verður ekki eina minnismerkið um Charlton á Old Trafford. Fyrir utan völlinn er stytta af honum ásamt Denis Law og George Best en styttan af þessari „heilögu þrenningu“ var afhjúpuð árið 2008, 40 árum eftir að United vann Evrópukeppni meistaraliða í fyrsta sinn.

The Sir Bobby Charlton Stand will be unveiled against Everton on Saturday 2 April. #mufc pic.twitter.com/kL0WIMKFLg

— Manchester United (@ManUtd) February 15, 2016