Arnar: Mótherjar Liverpool skynja ótta liðsins í föstum leikatriðum

„Það er karakter í þessu liði. Það náði í þetta stig á móti West Brom um daginn þar sem menn fögnuðu á Anfield og þeir voru svolítið gagnrýndir fyrir það. Þeir sýndu aftur karakter á móti Arsenal um daginn og núna komu þeir með aðra endurkomu.“

Þetta sagði Hjörvar Hafliðason, Messustjóri, í Messunni á mánudagskvöldið um endurkomusigur Liverpool á móti Norwich, 5-4.

Sigur Liverpool var sterkur í ljósi þess að liðið var undir nær allan leikinn, en varnarleikurinn er þó mikill hausverkur á Anfield.

„Þetta er karakter og Liverpool er með læti og setur pressu, en Norwich hjálpar til með slökum varnarleik. Varnarmaðurinn skallar út í teiginn. Hann verður að koma boltanum frá,“ sagði Þorvaldur Örlygsson, sem hrósaði þó Adam Lallana sem skoraði sigurmarkið.

„Hann er virkilega góður leikmaður og áræðinn. Hann var einn af betri leikmönnum Liverpool í þessum leik. Fram á við er Liverpool fínt lið. Það er í vandræðum í vörninni þar sem markverðinum er alltaf kennt um.“

„Kolo Touré var góður á sínum tíma. Hann getur hjálpað til í einum og einum leik en þarna eru þeir ekki að dekka og ekki að elta. Sakho leyfir sóknarmanninum að láta boltann skoppa í teignum.“

Arnar Gunnlaugsson hefur, eins og aðrir, áhyggjur af varnarleik Liverpool í föstum leikatriðum.

„Mótherjar Liverpool eru farnir að skynja ótta í hverju einasta fasta leikatriði. Það var enginn leikmaður Liverpool tilbúinn að ráðast á boltann og taka ábyrgð í þessum föstu leikatriðum,“ sagði hann.

„Ég held það sé óþægilegt fyrir liðið að vera með Mignolet í markinu. Við tölum oft um að hann sé góður á milli stanganna, en hans óöryggi í föstum leikatriðum er ekki að hjálpa leikmönnum Liverpool.“

Alla umræðuna má sjá í spilaranum hér að ofan.