Gylfi skorar mun meira utan Wales

Old Trafford, Anfield, White Hart Lane, Villa Park og Goodison Park eru allt heimsfrægir leikvangar í Englandi og allt vellir þar sem íslenski landsliðsmaðurinn Gylfi Þór Sigurðsson hefur fundið netmöskvana sem leikmaður Swansea City.

Gylfi skoraði fyrra mark Swansea í 2-1 sigri á Everton á sunnudaginn og er þar með búinn að skorað 19 mörk fyrir Swansea í ensku úrvalsdeildinni. Það sem vekur hins vegar athygli er að 14 af þessum 19 mörkum, 74 prósent markanna, hafa komið á útivöllum.

Eina mark Gylfa á heimavelli á þessu tímabili kom úr vítaspyrnu á móti Sund­erland í fyrsta heimaleik nýs árs. Þá var Gylfi búinn að spila tíu deildarleiki í röð á Liberty-leikvanginum.

Gylfi hefur skorað næstum því þrefalt fleiri mörk í útileikjum sínum fyrir Swansea og það er ekki hægt að hengja það á spilatíma því hann hefur bæði spilað fimm fleiri leiki á Liberty-leikvanginum og í 342 fleiri mínútur.

Það þarf því ekki að eyða löngum tíma í að átta sig á að það líða talsvert fleiri mínútur á milli marka hjá Gylfa á ensku völlunum en á heimavelli hans. Það líða 202 mínútur á milli marka hans í útileikjum en 634 mínútur á milli marka hans á Liberty-leikvanginum.

Gylfi er þó ekki alveg aðgerðalaus á Liberty því 13 af 16 stoðsendingum hans í búningi Swansea hafa komið á vellinum.

Íslenskir knattspyrnuáhugamenn geta glaðst yfir því að Gylfi hefur byrjað árið 2016 með því að skora þrjú mörk í fyrstu fjórum leikjunum. Swansea hefur líka unnið tvo þessara leikja og útilitið er ekki alveg eins svart að þegar liðið var komið niður í fallsæti.

Það eru líka líkur á marki í næsta leik Swansea sem er einnig á útivelli en liðið heimsækir þá West Bromwich Albion á The Hawthorns.