Hægt að kaupa Wanyama fyrir "fáránlega“ upphæð

Victor Wanyama, miðjumaður Southampton, verður ekki seldur nema fyrir stjarnfræðilega upphæð, samkvæmt heimildum Sky Sports.

Breska götublaðið The Sun greindi frá því í dag að Tottenham væri aftur á höttunum eftir Keníamanninum sem því mistókst að landa í sumar.

Arsene Wenger, knattspyrnustjóri Arsenal, hefur um langa hríð verið mjög hrifinn af Wanyama og er sagður ætla gera Dýrlingunum tilboð í hann í sumar.

Wanyama verður ekki seldur í janúar nema „fáránlegt“ tilboð berist eins og heimildamenn Sky Sports orða það.

Mauricio Pochettino, stjóri Tottenham, er aftur á móti sagður ekki ætla að bjóða í Wanyama í þessum mánuði, en Spurs-liðið er á miklum skriði og í alvöru baráttu um Englandsmeistaratitilinn.

Ronald Koeman, knattspyrnustjóri Southampton, hefur áður sagt að hann vilji festa Wanyama hjá Dýrlingunum til framtíðar en samningamál ganga mjög hægt.