Pato lánaður til Chelsea

Chelsea hefur fengið liðsstyrk fyrir síðari hluta tímabilsins í ensku úrvalsdeildinni en samkvæmt fréttavef Sky Sports hefur verið gengið frá sex mánaða lánssamningi félagsins við Corinthians í Brasilíu um framherjann Alexandre Pato.

Pato er 26 ára og hefur verið í láni hjá Sao Paolo síðan 2014. Hann gekk í raðir Corinthians frá AC Milan á Ítalíu árið 2012 en þar skoraði hann 51 mark í 117 leikjum með félaginu.

Sjá einnig: Pato er ekki að koma til Liverpool

Chelsea hefur einnig samið um kauprétt á Pato að tímabilinu loknu en forráðamenn Corinthians eru áhugasamir um að selja hann samkvæmt frétt Sky Sports.

Pato þótti á sínum tíma einn efnilegasti knattspyrnumaður Brasilíu og afrekaði að skora tíu mörk í 27 landsleikjum. En hann hefur ekki verið valinn í landsliðið síðan 2013.

Hann greindi frá því í september að hann hafi hafnað tilboði frá Manchester United rétt áður en lokað var á félagaskipti í haust.