Sjálfstæðisflokkur, Viðreisn og Björt framtíð reyna nú að ná málamiðlun varðandi stjórnarskrá, fiskveiðar og Evrópusambandið. Þessi þrjú mál standa enn út af borðinu og hafa lítið hreyfst áfram eftir að upp úr viðræðum flokkanna slitnaði síðast. Þó herma heimildir Fréttablaðsins að vilji flokkanna til sátta sé meiri nú en áður þar sem lítið hefur þokast frá kosningum í lok október.

Formenn flokkanna þriggja hittust í fyrradag og fóru yfir stöðu mála varðandi hugsanlega stjórnarmyndun. Samkvæmt heimildum Fréttablaðsins var gærdagurinn nýttur til skeytasendinga á milli flokkanna um orðalag tilvonandi stjórnarsáttmála um þessi þrjú veigamiklu atriði.

Þeir Bjarni Benediktsson, Benedikt Jóhannesson og Óttarr Proppé hafa ekki látið ná í sig síðustu tvo daga og ekki svarað skilaboðum Fréttablaðsins.

Þeir þingmenn Sjálfstæðisflokkssins sem Fréttablaðið talaði við í gær biðu átekta eftir því að verða kallaðir til fundar í þingflokknum.

Forseti Íslands vildi ekki svara því í gær hvort fyrirhugað væri að veita einhverjum umboð til stjórnarmyndunar eða hvort í deiglunni væru fundir með formönnum stjórnmálaflokkanna. Fari svo að mynduð verði ríkisstjórn flokkanna hefði hún aðeins eins manns meirihluta. Svo naumur meirihluti fer ekki vel í nokkra þingmenn Sjálfstæðisflokksins, samkvæmt heimildum blaðsins.

Fréttin birtist fyrst í Fréttablaðinu