Sjáðu þegar Kanye West strunsaði af sviðinu þegar hann frétti af ráninu

Raunveruleikastjarnan Kim Kardashian var rænd af tveimur vopnuðum mönnum í París í Frakklandi í gærkvöldi. Hún var stödd á lúxushóteli í borginni þegar mennirnir, sem voru íklæddir lögreglubúningum, bönkuðu upp á.

Eiginmaður hennar Kanye West kom fram á tónlistarhátíðinni The Meadows í New York í gær og varð að hætta fyrr en áætlað var vegna atviksins. West fékk fréttirnar á sviðinu og rauk rakleitt í burtu. Kanye bað áhorfendur afsökunar og sagði: „Það er neyðarástand hjá fjölskyldunni, ég verð að fara.“ Kanye var nýbyrjaður á laginu Heartless en fjölmörg myndbönd eru af atvikinu inni á vefsíðunni YouTube.

Hann átti um hálftíma eftir af sínu atriði og voru aðdáendur ekki sáttir. Þeir hafa væntanlega ekki gert sér grein fyrir alvarleika málsins.   

Mennirnir tveir sem rændu Kim Kardashian eru sagðir hafa dregið upp byssur og látið greipar sópa um hótelherbergið. Talið er að þýfið sé nokkurra milljóna dollara virði, en aðallega var um skartgripi að ræða. Ræningjanna er nú leitað. Talsmaður Kardashian segir að hún sé í miklu áfalli en ómeidd.

Hér að neðan má sjá myndbönd sem aðdáendur Kanye West setti inn á YouTube.