Elvu Christinu ber að afhenda Norðmönnum drenginn

Elvu Christinu, ungri móður sem flúði með fimm ára gamlan son sinn til Íslands frá Noregi, í kjölfar þess að til stóð að senda hann í fóstur ber að afhenda drenginn norskum barnaverndaryfirvöldum innan tveggja mánaða. Dómurinn þýðir það að móðirin fær ekki að hitta son sinn í 14 ár nema tvisvar á ári og þá undir eftirliti.

Skelfilegar sögur um norsk fósturheimili

Vísir hefur fjallað ítarlega um málið og rætt við bæði Elvu Christinu móður drengsins í viðtali sem birtist í gær, sem og ömmu hans, Helenu Brynjólfsdóttur. Þar hafa þær farið yfir það að norsk barnaverndaryfirvöld vilji fá drenginn og senda hann í fóstur. Elva Christina og Helena halda því fram að óbilgirni einkenni alla ákvarðanatöku norsku barnaverndarinnar og í engu sé tekið tillit til breyttra aðstæðna.

Christina var svipt forræði yfir drengnum en hún hefur átt við alkóhólisma að stríða; vandi sem hún hefur tekist á við. Fjölskyldan má ekki til þess hugsa að missa frá sér drenginn. Helena var að vonum brugðið þegar Vísir ræddi við hana í morgun. „Fósturheimili er svakaleg í Noregi og hefur verið mikið um þau fjallað; börn hafa mátt sæta kynferðislegri áreitni, nauðgun og oftar en ekki sitja þau ekki við sama borð og fjölskyldan sem þau eru send til. Það er til Facebook-síða sem fósturbörn stofnuð sérstaklega og þar eru hrikalegar frásagnir,“ segir Helena.

Þungar áhyggjur af framtíð drengsins

Helena telur þetta snúast að verulegu leyti um peninga sem fósturfjölskyldurnar fá frá norska ríkinu fyrir að taka að sér fósturbörn. Og af því litast öll þeirra afstaða og framkoma í garð barnanna. Helena hefur þungar áhyggjur af framtíð dóttursonar síns.

Helena segir jafnframt að íslenska ríkið megi skammast sín fyrir að senda fimm ára gamlan ríkisborgara út í slíkar aðstæður. Helena býst fastlega við því að málinu verði áfrýjað þó ekki sé hún bjartsýn á að það breyti nokkru. Báðar voru þær mæðgur svartsýnar á niðurstöðuna, eftir að hafa verið viðstaddar málflutning og tilfinning þeirra reyndist rétt.