Innlent

Þungar áhyggjur og þórðargleði eftir afhroð Sjálfstæðiskvenna

Sunna Kristín Hilmarsdóttir skrifar
Unnur Brá Konráðsdóttir, Ragnheiður Elín Árnadóttir og Elín Hirst áttu ekki mikilli velgengni að fagna í prófkjörum Sjálfstæðismanna um helgina.
Unnur Brá Konráðsdóttir, Ragnheiður Elín Árnadóttir og Elín Hirst áttu ekki mikilli velgengni að fagna í prófkjörum Sjálfstæðismanna um helgina.
Niðurstöður úr prófkjörum Sjálfstæðisflokksins í Suðvesturkjördæmi og Suðurkjördæmi hafa vakið mikla athygli fyrir þær sakir hversu lélega kosningu þær konur sem buðu sig fram hlutu. Þannig eru karlar í efstu fjórum sætum flokksins í Suðvesturkjördæmi og hlýtur Elín Hirst þingkona afleita kosningu en hún kemst ekki í efstu sex sætin.

Sjá einnig:Ragnheiður Elín hætt í stjórnmálum

Í Suðurkjördæmi eru svo karlmenn í efstu þremur sætunum en í síðustu kosningum var listinn leiddur af tveimur konum, þeim Ragnheiði Elínu Árnadóttur, iðnaðar-og viðskiptaráðherra, og Unni Brá Konráðsdóttur þingkonu. Ragnheiður hafnaði í fjórða sæti í prófkjörinu í gær og Unnur Brá í því fimmta. Framkvæmdastjórn Landssambands kvenna harmar niðurstöðurnar og það gerir Hvöt félag sjálfstæðiskvenna í Reykjavík einnig en bæði félögin hafa sent frá sér yfirlýsingar þess efnis. Er skorað á kjörnefndir að endurskoða uppröðun listanna.

Vandræðaleg niðurstaða segir fyrrverandi varaþingmaður

Þá hafa ýmsir tjáð sig um þessar karllægu niðurstöður, ef svo má að orði komast, frá því að fyrstu tölur bárust í gærkvöldi og þar til lokatölur úr báðum kjördæmunum lágu fyrir. Erla Ósk Ásgeirsdóttir fyrrverandi varaþingmaður Sjálfstæðisflokksins sagði til að mynda á Facebook-síðu sinni þegar fyrstu tölur komu úr Kraganum að niðurstaðan væri vandræðaleg. Vonaðist hún til þess að röðin á listanum myndi breytast og klykkti út með #becauseits2016.

Pawel Bartoszek frambjóðandi Viðreisnar í Reykjavík og pistlahöfundur fer fögrum orðum um Unni Brá í færslu á Facebook-síðu sinni í morgun. Hann leggur út af nýjum útlendingalögum sem samþykkt voru þegar Unnur Brá var formaður allsherjarnefnd en hún barðist fyrir samþykkt frumvarpsins á þingi og segir Pawel að af öllum þeim lagabreytingum sem farið hafi þar í gegn nú séu fáar sem hafa jafn jákvæð áhrif á líf valdalítils fólks.

„Körfuboltamenn og doktorsnemar geta nú komið með börn sín til landsins og erlent verkafólk utan Evrópu mun ekki þurfa yfirgefa landið sjálfkrafa eftir tveggja ára erfiðisvinnu. Og nokkrar aðra minniháttar en mjög jákvæðar breytingar. Allt þetta studdi Unnur Brá. Þetta var góð stefna, en stundum erfiðari pólitík.

Það er leiðinlegra að þurfa berjast um að komast á þing sem verður án Unnar Brár. En maður getur alla vega átt sér fyrirmynd. Maður þarf að muna eftir því að í pólitík getur maður oft tapað á því að gera góða hluti. Stundum huggar sig maður við það að manns verði minnst fyrir það, en því miður, þá er það bara ekki víst að svo verði. Maður getur gert gott án þess að neinn þakki manni fyrir það, verðlauni mann fyrir það, eða minnist manns fyrir það.

Stundum verður maður nefnilega bara drullast til að gera gott,“ segir Pawel.

Fjölmargir hafa svo tjáð sig um málið á Twitter þar á meðal Hallgrímur Helgason rithöfundur sem segir íslenska hægrið vera tvenns konar:

„Íslenska hægrið: Við með reisn annarsvegar og Við með Viagra hinsvegar.“

Bragi Valdimar Skúlason Baggalútur hefur meðal annars þetta um málið að segja:

 

„Þið vitið samt að það breytist ekkert ef maður horfir bara á gamla karla prófkjósa sjálfa sig — og hneykslast á því. Það þarf að taka þátt.“

Það er þó ekki aðeins í Sjálfstæðisflokknum þar sem árangur kvenna í prófkjörum hefur vakið athygli heldur hlutu tvær reyndar þingkonur Samfylkingarinnar, Ólína Þorvarðardóttir og Valgerður Bjarnadóttir, dræma kosningu í flokksvali í Norðvesturkjördæmi annars vegar og í Reykjavík hins vegar en karlar höfðu sigur í flokksvalinu í báðum tilfellum.

Kosningar 2016 X16 Suður

Tengdar fréttir

Mest lesið


Fleiri fréttir

Sjá meira


×

Mest lesið