Forgangsstýring sögð bylting

Ný forgangsstýring umferðarljósa er bylting fyrir neyðarbíla og eykur öryggi almennings segir slökkviliðsstjórinn á höfuðborgarsvæðinu. Hann og borgarstjóri prufukeyrðu nýja búnaðinn í morgun.

Í sumar voru gerðar breytingar á umferðarljósum í Reykjavík til að hægt væri að stýra þeim með sérstökum búnaði. Búnaðurinn var formlega ræstur í morgun þegar sjúkrabíl og slökkvibíl var ekið frá Skógarhlíð um Bústaðaveg og Snorrabraut í forgangsakstri þar sem bílarnir gátu komist leiðar sinnar á auðveldan hátt vegna þess að þeir gátu framkallað græn ljós á leið sinni niður Snorrabraut. Mikilvægt þykir að hafa stýringu á þeirri leið til að greiða fyrir umferð neyðarbíla að Landspítala.



Aukið öryggi

Jón Viðar Matthíasson, slökkviliðsstjóri á höfuðborgarsvæðinu, segir búnaðinn vera byltingu fyrir þá sem sinna forgangsakstri.

„Þetta er öryggi fyrir vegfarendur, öryggi fyrir okkur og bætt þjónusta.“Segir Jón Viðar.

Búnaðurinn er nú eingöngu stilltur við ljós á þeirri leið sem ekin var í morgun en Dagur B. Eggertsson, borgarstjóri í Reykjavík, segir að líklegt megi telja að stýringin verði tengd við öll ljós höfuðborgarsvæðisins áður en langt um líður.



Einnig fyrir strætisvagna

„Við erum með þessu að nota tæknina til að gefa neyðarflutningum fyrsta forgang. En svo nýtist þetta líka fyrir forgang strætisvagna og almenningssamgöngur. Þetta eru margar flugur í einu höggi.“

Ljósastýring strætisvagnanna verður þó ekki með alveg sama hætti og hjá viðbragðsaðilunum heldur mun græna ljósið loga lengur nálgist vagninn gatnamót.

„Ég held að við séum að stíga fyrsta skrefið af mörgum inn í framtíðina hvað þetta snertir. Bæði til að stýra umferðarflæðinu svo það verði eins gott og hægt er og svo líka fyrir þessar sérstöku þarfir, sem neyðarflutningarnir eru auðvitað.“ Segir Dagur.