Ferðamaður gerði sér svefnstað á bekk fyrir utan Hafnarkirkju

Lögreglumenn á Höfn í Hornafirði höfðu afskipti af ferðamanni sem hafði gert sér svefnstað á bekk fyrir utan Hafnarkirkju á Höfn. Að því er fram kemur í Facebook-færslu lögreglunni á Suðurlandi var manninum bent á tjaldsvæðið og er hann sagður hafa tekið ábendingunni vel og segir lögreglan hann hafa talið það vera góða lausn á gistimálum sínum.

Þá slasaðist kona þegar hún varð á milli bíls og veggjar á þvottaplani á Hvolsvelli síðastliðinn föstudag. Komið var að dauðu lambi í vegkanti þjóðvegar 1 við Höfn í vikunni. Af ummerkjum að dæma mátti vera ljóst að ekið hafi verið á lambið en ökumaður ekki látið vita og liggur ekki fyrir hver hann er að sögn lögreglu.

Í síðustu viku voru 44 ökumenn kærðir fyrir hraðakstur í umdæmi lögreglustjórans á Suðurlandi. Þrír voru kærðir fyrir akstur undir áhrifum ávana- og fíkniefna og einn fyrir ölvunarakstur.