Engin sátt er um breytt búvörulög

Alþingi Þingflokkur Bjartrar framtíðar leggur til einn flokka að búvörulögum verði vísað frá þinginu. Lagt er til að núverandi samningar verði framlengdir og vinna hafin að nýjum samningi sem meiri sátt ríki um.

Meirihluti atvinnuveganefndar kynnti í gær breytingar á búvörusamningunum en þær eru ætlaðar til þess að skapa víðtæka sátt um málið í þinginu. Unnið hefur verið að breytingum í sumar og vonaðist Jón Gunnarsson, formaður nefndarinnar, eftir því að þær gætu skapað einróma sátt í nefndinni.

Á þessu stigi ríkir trúnaður um breytingartillögur meirihlutans en samkvæmt heimildum Fréttablaðsins er einn liður þeirra að stytta samningstímann. Björt Ólafsdóttir, þingmaður BF, vildi hvorki staðfesta þann orðróm né neita en sagði stóra ágreininginn ekki þar.

Fulltrúi VG í nefndinni, Lilja Rafney Magnúsdóttir, telur breytingarnar vera góðar og hefur látið hafa það eft ir sér að hún geti vel stutt málið eins og það líti út núna. Björt Ólafsdóttir, kollegi Lilju í minnihluta nefndarinnar, segir breytingartillögurnar hins vegar ekki breyta skoðun Bjartrar framtíðar á samningunum.

„Eins og þetta lítur út núna er ekki gert ráð fyrir að undanþágur frá samkeppnislögum séu afnumdar,“ segir Björt. „Einnig gera samningar ráð fyrir hækkun á magntollum á mjólkurafurðum og vægi gripagreiðslna aukið sem er framleiðsluhvetjandi og ekki til þess fallið að verja viðkvæmt land á sumum stöðum. Því getum við eins og staðan er núna ekki samþykkt þessa samninga.“

Þessi frétt birtist upphaflega í Fréttablaðinu.