Handtekinn með rafbyssu í Reykjavík

Það fór tvennum sögum af verkefnum lögreglu um landið í nótt. Víða um land höfðu þeir nóg að gera en á öðrum stöðum var nokkuð rólegt.

Í Vestmannaeyjum voru um fimmtánþúsund manns samankomnir í Herjólfsdal þegar mest lét. Telja menn að hátíðin í ár hafi verið sú næstfjölmennasta frá upphafi. Framan af var nóttin róleg en þegar líða tók á hana var meira að gera. Fimm gistu fangageymslur vegna mismunandi brota. Samráðsfundur verður hjá viðbragðsaðilum Þjóðhátíðar nú eftir hádegi og skýrist þá betur hvað fór þar fram.

Í dagbók lögreglunnar á höfuðborgarsvæðinu kemur fram að nokkuð hafi verið um akstur undir áhrifum áfengis, vímuefna eða án ökuréttinda. Þá var maður handtekinn, skömmu fyrir fjögur í nótt, með rafstuðbyssu. Honum var sleppt eftir skýrslutöku.

Snemma í morgun var tilkynnt um líkamsárás í Reykjavík. Einn maður var handtekinn og gistir hann fangageymslur sem stendur. Þá var tilkynnt um eignaspjöll og innbrot í borginni.

Lögreglan á Suðurlandi þurfti að hafa afskipti af fólki sem gisti á tjaldsvæðinu á Flúðum. Nokkuð var um ölvun og læti þar. Alls gistu þrír fangageymslur á Selfossi.

Á Ísafirði fór Evrópumeistaramótið í mýrarbolta fram. Þar í bæ var ball og brenna í gær. Að sögn varðstjóra fór allt nokkuð vel fram. Nokkuð var um ölvun en engar kærur hafa komið inn á borð lögreglunnar. Nokkrir ökumenn voru teknir fyrir of hraðan akstur en sá sem hraðast ók mældist á 138 kílómetra hraða á klukkustund.

Svipaða sögu var að segja frá Akureyri og Neskaupsstað. Þar fóru fram hátíðirnar Sumarleikarnir og Neistaflug. Að sögn lögreglunnar á Akureyri átti ekkert sér stað þar í bæ nema hávaði frá skemmtanahaldi.

Frá Neskaupstað fengust þær upplýsingar að þar hefði verið örlítill erill vegna ölvunar en engar kærur eða slagsmál átt sér stað. 35 ökumenn hefðu verið stöðvaðir fyrir of hraðan akstur.