Ófaglærðum kennurum í grunnskólum landsins fjölgar að nýju en þeim fækkaði mikið eftir hrun. Hlutfall ófaglærðra kennara er mjög misjafnt eftir landsvæðum og skera Vestfirðir og Suðurnes sig úr.



Alls fjölgar um sextíu ófaglærða á landinu öllu milli áranna 2013 og 2015. Þar af er fjölgunin 57 á höfuðborgarsvæðinu og á Suðurnesjum en aðeins fjölgar um þrjá ófaglærða á öllum hinum svæðum landsins. Þetta kemur fram í tölum Hagstofunnar sem birtar voru í gær.



Helgi Arnarson, fræðslustjóri Reykjanesbæjar, stærsta sveitarfélagsins á Suðurnesjum, segir sama vera að gerast nú og þegar atvinnuleysi var í lágmarki fyrir hrun. Menntaðir kennarar sæki í önnur vel launuð störf og því sé erfitt að manna kennarastöður með menntuðum kennurum á meðan. „Hér á Suðurnesjum erum við auðvitað með mjög stóran vinnustað sem Leifsstöð er og á meðan ferðaþjónustan blómstrar og völlurinn stækkar og stækkar virðist alltaf vera pláss fyrir vel launuð störf þar sem menntun og hæfni kennara nýtist mjög vel,“ segir Helgi.



Kjartan Már Kjartansson, bæjarstjóri Reykjanesbæjar, segir bæjarfélagið þurfa að skoða tölur Hagstofunnar. „Þetta er auðvitað eitt af því sem við skoðum reglulega og munum halda því áfram. Markmiðið er auðvitað að sem flestir kennarar séu menntaðir í faginu,“ segir Kjartan Már. Hafa ber í huga að Suðurnes eru hér öll undir og því gæti fjöldinn verið mismunandi milli bæjarfélaga innan landshlutans.

Hæst hlutfall ófaglærðra kennara er á Vestfjörðum. Arna Lára Jónsdóttir, formaður bæjarráðs Ísa­fjarðar­bæjar, segir það ekki nýjar fregnir. „Sökum landfræðilegrar stöðu Vestfjarða hefur ávallt verið erfitt að manna stöður hér. En eftir að Háskólinn á Akureyri fór að bjóða upp á fjarnám í kennaranámi varð bylting hjá okkur þannig að kennarar gátu sótt menntun án þess að þurfa að flytja búferlum. Það breytti miklu fyrir okkur og menntunarstig kennaranna okkar,“ segir Arna Lára.