Innlent

Sigmundur Davíð fór mikinn í viðtali hjá Útvarpi Sögu: „Það var mikið undir þarna og margir sem sáu þarna tækifæri til að losna við mig“

Birgir Olgeirsson skrifar
Sigmundur Davíð við Bessastaði í apríl síðastliðnum.
Sigmundur Davíð við Bessastaði í apríl síðastliðnum. Vísir/Anton

Sigmundur Davíð Gunnlaugsson, formaður Framsóknarflokksins, segist hafa eignast marga óvini í tengslum við haftamálin sem vildu losna við hann og sáu tækifæri í Panama-lekanum til að gera það.

Þetta sagði Sigmundur Davíð í viðtali við Arnþrúði Karlsdóttur og Pétur Gunnlaugsson í síðdegisútvarpi Útvarps Sögu. Hægt er að hlusta á viðtalið hér.

Sigmundur Davíð sagði af sér í apríl síðastliðnum eftir að leki frá panömsku lögmannsstofunnar Mossack Fonseca leiddi í ljós tengsl Sigmundar Davíðs við aflandsfélagið Wintris sem heldur utan um fjölskylduarf eiginkonu hans Önnu Sigurlaugar Pálsdóttur.

Sænska ríkissjónvarpið SVT bókaði Sigmund Davíð í viðtal í mars síðastliðnum þar sem hann var spurður út í Wintris af fréttamanni sænska ríkissjónvarpsins og Jóhannes Kr. Kristjánssyni hjá Reykjavík Media. Sigmundur Davíð gekk úr viðtalinu og var í kjölfarið til umfjöllunar á fréttamiðlum um nánast heim allan.

Svo fór að Sigmundur Davíð steig úr stóli forsætisráðherra en hefur nú boðað endurkomu sína í stjórnmálin. 

„Sagt mér að ég myndi hafa verra af“
Sigmundur Davíð sagði við Arnþrúði og Pétur að ýmislegt áhugavert hefði komið í ljós í þessu máli á síðustu vikum og mánuðum. Hann sagði baráttu sína í verðtryggingarmálinu hafa verið stóran þátt á bak við það að koma höggi á sig með þessum Panama-skjölum.

„En ég held að þetta hafi snúist meira um þetta haftastríðið þar sem verið var að fást við mjög öfluga andstæðinga sem höfðu beinlínis sagt mér að ég myndi hafa verra af ef ég myndi klára þetta svona. Svo bætast við þessi verðtryggingamál og það má kannski segja að maður hafi safnað óvinum með því að taka þessa stóru slagi,“ sagði Sigmundur Davíð.

Sjá einnig: Segir sálgreiningar gerðar á stjórnmálamönnum og blaðamönnum

„Höggva að manninum sem var að berjast gegn verðtryggingunni“
Hann sagði að þegar „reitt var til höggs“ með Panama-umfjölluninni hafi margir verið til í að taka þátt í því. „Þá er þetta lið til í að taka þátt í því sem sá þarna tækifæri til að höggva að manninum sem var að berjast gegn verðtryggingunni eða manninum sem vildi hrista upp í fjármálakerfinu eða manninum sem var búinn að ná öllum bönkunum nema Arion-banka til ríkisins og ætlaði að endurskipuleggja fjármálakerfið. Það var mikið undir þarna og margir sem sáu þarna tækifæri til að losna við mig,“ sagði Sigmundur Davíð.

Hann sagðist hafa nokkuð góða hugmynd um hvaða áhrifamenn vildu hann í burtu en það væri efni í heilan þátt til viðbótar hjá Arnþrúði og Pétri. „En mjög margt áhugavert sem hefur komið í ljós. Þessi aðför sem hafði verið í undirbúningi í sjö mánuði í nokkrum löndum og beitt þessum gögnum sem Soros-vogunarsjóðskóngur hafði keypt og gat notað að vild,“ sagði Sigmundur Davíð og á þar við alþjóðlega fjárfestinn George Soros.

„Eftir einhverjum reglum valið úr“
Sigmundur sagði það vera áhugavert að ekki voru margir Bandaríkjamenn á þessum Panama-lista. „Og líklega enginn af þessum vogunarsjóðsmönnum sem fara nú mikinn og eru með með vikulaun kannski eitthvað svipað og konan mín hafði fengið í fjölskylduarf. Það var greinilega eftir einhverjum reglum valið úr hverjir yrðu teknir úr og svo var bara skrifuð sagan og skipti engu máli hvað kom fram í millitíðinni, hvað reyndist rangt og rétt.“

Þá sagði Sigmundur Davíð áhugavert að skoða hvernig var farið með málið pólitískt. Hann sagði það alltaf vera fréttnæmt að nafn forsætisráðherra væri á lista sem væri búið að leka. „En berið bara saman umfjöllunina um forsætisráðherra íslands og forsætisráðherra Bretlands hins vegar. Í hans tilviki hafði hann hagnast á þessu að greiða ekki skatta. Það er margt skrýtið í þessu og áhugavert en ég held að við þurfum lengri tíma,“ sagði Sigmundur Davíð að lokum.


Tengdar fréttir

Kosningar í haust nema allt fari í bál og brand

"Auðvitað verða kosningar að lokum. En ég hef enga trú á því að stjórnarandstaðan fari að stöðva mál sem að eru landi og þjóð nauðsynleg, ég hef bara enga trú á því,” segir Sigurður Ingi.

Skoðun formanns á kosningum skipti engu

Þó að formaður Framsóknar vilji fresta boðuðum kosningum í haust virðist það engu skipta. Forseti Alþingis segir þingrofsréttinn í höndum forsætisráðherra með samþykki forseta.

Óhjákvæmilegt að fjölga þingfundardögum

Óhjákvæmilegt er að bæta við þingfundardögum í haust til að klára öll mál ríkisstjórnarinnar. Þetta segir formaður Framsóknarflokksins. Samkomulag um að flýta kosningum hafi verið viðleitni til að ná saman við stjórnarandstöðuna en vantrauststillaga hennar hefði haft áhrif á þau áform.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.