Óháðir fasteignasalar mátu virði eignanna á Gufunesi

Borgarráð Reykjavíkur samþykkti á föstudaginn að selja RVK-Studios, framleiðslufyrirtæki Baltasar Kormáks, fasteignir á Gufunesi. Fyrirtækið hyggst reisa kvikmyndaver á Gufunesi og greiðir rúma 301 milljón fyrir fasteignirnar.

Byggingarnar eru fjórar og tilheyrðu áður áburðarverksmiðjunni í Gufunesi. Því hefur verið fleygt að RVK-Studios fái fasteignirnar á gjafaverði. Dagur B. Eggertsson borgarstjóri Reykjavíkur segir að svo sé ekki.

„Þegar við seljum svona fáum við tvo óháða fasteignasala að leggja mat á verðgildið og þeirra verkefni er að meta markaðsverð og það var farið eftir þeirra mati við gerð á kaupsamningum,“ segir Dagur.

Hann segir það vera skilyrði í samningum að á svæðinu verði byggð upp starfsemi undir kvikmyndaiðnað. Vilji sé fyrir hendi að með tíð og tíma rísi í Gufunesi þorp undir skapandi greinar.

„Þau vilyrði um kaup á öðrum hugsanlegum lóðum þarna í kring sem fylgja samningum eru háð því að þarna sé blómleg kvikmyndagerð.“

Hann telur að mikill ágóði gæti hlotist af því að byggja upp starfsemi af þessum toga í borginni.

„Þetta er eitt af lykilatriðunum í atvinnustefnu og samkeppnisstefnu borgarinnar að skapandi greinar hafi vaxtarmöguleika. Þarna skapast áhugaverð störf fyrir ungt fólk og smitar yfir á allskonar aðra hluti ef að hingað tekst að laða innlend og erlend kvikmyndatengd verkefni þá eru gríðarlegir hagsmunir undir, ekki bara fyrir Reykjavík heldur líka Ísland,“ segir Dagur.