Krefjast þess að Alda Hrönn verði dæmd og svipt embætti sínu

Tveir sakborningar í LÖKE-málinu svokallaða saka Öldu Hrönn Jóhannsdóttur, fyrrverandi varalögreglustjóra á Suðurnesjum og núverandi aðallögfræðing lögreglunnar á höfuðborgarsvæðinu, um brot í starfi og krefjast þess að hún verði ákærð og gerð þyngsta refsing sem lög leyfa. Þá vilja þeir að hún verði svipt embætti sínu hjá lögreglunni á höfuðborgarsvæðinu.

RÚV birti kærurnar á hendur Öldu Hrönn í kvöld. Mennirnir tveir sem kæra hana eru fyrrverandi starfsmaður Nova og lögreglumaðurinn Gunnar Scheving Thorsteinsson, en hann sætti ákæru í málinu. Þeir saka Öldu Hrönn meðal annars um ærumeiðandi aðdróttanir, rangar sakargiftir og hlutdeild í dreifingu hefndarkláms.

Sjá einnig:Gunnar sýknaður í héraðsdómi en sakfelldur í Hæstarétti



Tvímenningarnir krefjast þess að meint brot Öldu Hrannar í tengslum við rannsókn LÖKE-málsins verði rannsökuð og fara fram á skaðabætur úr hendi hennar.

Gunnar Scheving segir Öldu Hrönn hafa borið á sér tilbúnar sakir án tilefnis eða málefnalegra ástæða fyrir grunsemdum. Hún hafi aflað án heimildar afrita af einkasamræðum við trúnaðarvini og notað þau til að hefja rannsókn á sér og tveimur vinum.

Hann segir jafnframt að á meðal þeirra gagna sem Alda Hrönn hafi tekið við og dreift án þess að lögreglumál væri í gangi, eða aðstæður hafi réttlætt slíkt athæfi, hafi verið nektarmynd af sér. „Ekki verður annað séð en að athæfi Öldu Hrannar falli undir verknaðarlýsingu á hlutdeild í dreifingu hefndarkláms,“ segir í kærunni, sem birt var í heild á vef RÚV. Gunnar segir afleiðingar þess hafa haft áhrif á sálarlíf sitt og fer fram á skaðabætur úr hendi Öldu.

Gunnar fer fram á að meint brot Öldu verði rannsökuð í þaula og að rannsóknarheimildum héraðssaksóknara verði beitt til hins ítrasta.

Hæstiréttur sakfelldi Gunnar í janúar síðastliðnum fyrir að brjóta gegn þagnarskyldu opinberra starfsmanna er hann miðlaði upplýsingum til þriðja aðila sem leynt áttu að fara. Áður hafði Héraðsdómur Reykjavíkur sýknað Gunnar. Upphaflega var hann einnig ákærður fyrir að hafa flett upp nöfnum 45 kvenna í upplýsingakerfi lögreglunnar, LÖKE, án þess að uppflettingarnarnar tengdust starfi hans, en var sá ákæruliður felldur niður þar sem ekki var talið sannað að Gunnar hefði gerst sekur um refsiverða háttsemi.

Gunnari var ekki gerð refsing í málinu en Hæstiréttur leit meðal annars til þess að hann hefur ekki hlotið dóm áður.

Ríkissaksóknari sagði í samtali við RÚV í mars í fyrra að gögn gæfu ekki til kynna að nokkuð sé hæft í þeim fullyrðingum Gunnars um að málið hafi verið rannsakað án heimildar af Öldu Hrönn.