Sheringham fór í dulargervi að horfa á liðið sem rak hann spila

Teddy Sheringham, sem var rekinn úr knattspyrnustjórastöðu D-deildarliðsins Stevenage 1. febrúar, fór á völlinn í dulargervi nokkrum dögum síðar til að sjá sína gömlu lærisveina spila.

Sheringham, sem gerði garðinn frægan með Tottenham og Manchester United í ensku úrvalsdeildinni á árum áður, var rekinn frá Stevenage eftir að vinna ekki í átta leikjum í röð.

Í heildina vann Sheringham aðeins sjö af þeim 33 leikjum sem hann stýrði liðinu en þessi fyrrverandi landsliðsframherji Englands entist aðeins átta mánuði í starfi hjá Stevenage.

„Ég var rekinn á mánudegi og Stevenage átti leik á heimavelli laugardaginn eftir það. Ég vildi sjá hvernig leikmennirnir myndu bregðast við brottrekstrinum.“ segir Sheringham í viðtali við Sky Sports.

„Ég fór í dulargervi. Við getum orðað það þannig. Ég vildi bara sjá hvernig leikmenn og stuðningsmenn myndu bregðast við þessu og finna andrúmsloftið á staðnum.“

„Ég hef áhyggjur af Stevenage. Ég vil ekki að liðið falli. Mest langaði mig að vita hvort þetta væri allt saman mér að kenna og hvort liðið væri betra án mín,“ segir Sheringham.

Stevenage tapaði umræddum leik gegn Crawley en vann svo Hartlepool í gærkvöldi og er ellefu stigum frá fallsæti. Sheringham áttar sig á að orðspor sitt sem knattspyrnustjóri er ekki í hæstu hæðum eftir aðeins átta mánuði í starfi hjá Stevenage.

„Ef ég get ekki staðið mig hjá Stevenage í D-deildinni hver ætlar þá að ráða mig? Svona hugsaði ég þetta fyrst. En maður lifir og lærir þannig ef ég fæ annað tækifæri geri ég ekki sömu mistök,“ segir Teddy Sheringham.