Samherji Forsters segir hann einn af þeim betri í Evrópu

Markvörðurinn Fraser Forster hefur heldur betur komið sterkur til baka eftir erfið hnémeiðsli.

Forster hélt hreinu þegar Southampton vann 0-1 sigur á Swansea City á laugardaginn og hefur nú haldið hreinu í öllum sex leikjum Dýrlinganna síðan hann kom aftur inn í liðið. Southampton hefur unnið fimm af þessum leikjum og er nú aðeins einu stigi á eftir Manchester United í 5. sætinu.

Oriol Romeu, samherji Forsters hjá Southampton, segir að hann sé í hópi bestu markvarða Evrópu.

„Hann er einn af þeim bestu í deildinni og einn af þeim bestu í Evrópu,“ sagði Romeu um markvörðinn risavaxna sem kom til Southampton frá Celtic sumarið 2014.

„Hann á allt hrós skilið, líkt og varnarlínan í heild sinni. Þetta snýst allt um liðssamvinnu,“ bætti Romeu við.

Forster, sem hefur haldið hreinu í 20 af 36 deildarleikjum sínum fyrir Southampton, hefur leikið þrjá A-landsleiki fyrir England og verður að öllum líkindum í leikmannahópi enska liðsins á EM í Frakklandi í sumar.