Enski boltinn

Özil sló met sem Giggs og Gerrard áttu saman

Óskar Ófeigur Jónsson skrifar
Mesut Özil.
Mesut Özil. Vísir/Getty
Mesut Özil hefur verið í miklum stoðsendingaham á þessu tímabili og metin eru farin að falla.

Mesut Özil hefur gefið 17 stoðsendingar á félaga sína í Arsenal í þeim 24 leikjum sem hann hefur spilað og vantar nú bara þrjár stoðsendingar til að jafna met Thierry Henry.

Sautjánda stoðsendingin kom í sigrinum á Leicester City um helgina en hann lagði þá upp sigurmarkið fyrir Danny Welbeck.

Annað met er hinsvegar í höfn hjá þýska landsliðsmanninum því hann hefur skapað fullt af færum sem liðfélögum hans í Arsenal hefur ekki tekist að nýta.

Enska úrvalsdeildin heldur ekki bara utan um stoðsendingar heldur einnig sköpuð skotfæri, sem eru sendingar sem hefðu verið stoðsendingar, ef leikmaðurinn sem tók við sendingunni, hefði nýtt færið sitt.

Þegar Mesut Özil lagði upp færið fyrir Danny Welbeck þá var hann að skapa 106. skotfærið fyrir félaga sinn í Arsenal-liðinu á leiktíðinni. Özil er nefnilega búinn að skapa 4,4 skotfæri að meðaltali í leik og er því búinn að bæta metið þótt að enn séu tólf leikir eftir.

Í raun mætti aðeins gagnrýna leikmenn Arsenal fyrir það að nýta ekki færin enda hafa þeir þegar "eyðilagt" 88 stoðsendingar fyrir Özil í vetur.

Gamla metið áttu þeir Ryan Giggs og Steven Gerrard saman. Báðir sköpuðu þeir 104 færi fyrir félaga sína, Giggs hjá Manchester United tímabilið 2006-07 og Gerrard fyrir Liverpool á tímabilinu 2007-08.

Stoðsending Mesut Özil var reyndar fyrsta stoðsendingin hans á árinu 2016 og nú er að sjá hvort hann komist á sama skrið og fyrir áramót þegar hann gaf 13 stoðsendingar í 11 leikjum frá 26. september til 21. desember.

Enski boltinn

Mest lesið


Fleiri fréttir

Sjá meira


×

Mest lesið