Innlent

Fjórir keppa áfram á Kársnesi

Garðar Örn Úlfarsson skrifar
Ármann Kr. Ólafsson, bæjarstjóri Kópavogs, lýsti ánægju með tillögur í hugmyndasamkeppni um Kársnesið.
Ármann Kr. Ólafsson, bæjarstjóri Kópavogs, lýsti ánægju með tillögur í hugmyndasamkeppni um Kársnesið. vísir/anton
Fjórar tillögur komust áfram í annað þrep í hugmyndasamkeppni um Kársnesið í Kópavogi sem sjálfbæra líftaug.

„Með því að taka inn þær nýju og fersku hugmyndir sem fram koma í tillögunum tel ég að við tryggjum að uppbygging sem framundan er á Kársnesi verði vel heppnuð,“ segir Ármann Kr. Ólafsson, bæjarstjóri í Kópavogi.

Nítján tóku þátt í Kársness-samkeppninni sem er á vegum Nordic Built Cities. Það er verkefni sem fyrst og fremst er ætlað að efla nýsköpun og samkeppnishæfni Norðurlandanna. Kársnes var valið til þátttöku í fyrra ásamt fimm öðrum þéttbýlissvæðum á hinum Norðurlöndunum. Fram kemur í tilkynningu frá Kópavogsbæ að Nordic­ Built Cities leggi áherslu á að tillögurnar leiði til nýjunga í vöru eða þjónustu sem mætti mögulega nota til útflutnings frá Norðurlöndunum.

Allar tillögurnar gera ráð fyrr brú frá Kársnesi yfir Fossvog til Reykjavíkur enda er sú tenging bæði í aðalskipulagi Kópavogs og höfuðborgarinnar. Þór Sigfússon, framkvæmdastjóri Íslenska sjávarklasans, sem er formaður dómnefndar í samkeppninni, sagði í ávarpi þegar tillögurnar fjórar voru kynntar í gær, að ekki gerðu sér allir grein fyrir möguleikum Kársness eftir að Fossvogurinn hefði verið brúaður.

Meðal hugmynda í tillögunum má nefna sundlaug úti á Fossvogi og sporvagna.

„Það er lyftistöng fyrir bæinn að vestast á Kársnesinu verði til hverfi þar sem atvinnulíf og íbúðarbyggð blandast saman og möguleikar til fjölbreyttrar útivistar eru nýttir til fulls. Þá munu lífsgæði íbúa svæðisins aukast verulega þegar brú yfir Fossvog tengir Kársnes við Reykjavík,“ segir Ármann bæjarstjóri.

Þeir fjórir keppendur sem eftir eru fá nú frest til 22. maí til að skila inn tillögum í næsta þrepi keppninnar. Í júní mun síðan dómnefndin velja eina tillögu sem verður send utan í lokakeppni Nordic Built Cities.

Tillögurnar fjórar fá nú 150 þúsund norskar krónur, sem svarar til tæplega 2,3 milljóna króna, í verðlaun. Sömu upphæð fá keppendurnir síðan eftir að 2. þrepi er lokið í maí auk þess sem sigurvegarinn þá fær 250 þúsund norskar krónur til viðbótar.

Vinni viðkomandi síðan heildarkeppnina bíða aðrar 500 þúsund norskar krónur í verðlaun. Samtals verða því verðlaun fyrir sigurvegarann í lokakeppninni 1.050.000 norskar krónur sem svarar til ríflega 15,7 milljóna króna.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.