Silva: PSG getur farið taplaust í gegnum tímabilið

Paris Saint-Germain hefur ótrúlega yfirburði í frönsku 1. deildinni í fótbolta.

Þegar 25 umferðum af 38 er lokið er PSG með 24 stiga forskot á Monaco sem er í 2. sæti. Til marks um yfirburði PSG er jafn mikill munur á liðunum í sætum eitt og tvö og á liðunum í 2. og 19. sæti.

PSG hefur unnið 22 af 25 deildarleikjum sínum á tímabilinu og gert þrjú jafntefli. Thiago Silva, fyrirliði PSG, segir að Parísarliðið geti farið ósigrað í gegnum tímabilið.

„Ef við höldum áfram á þessari braut getum við farið taplausir í gegnum tímabilið,“ sagði Brasilíumaðurinn.

„Þetta er ekki markmið okkar en það væri stórkostlegt ef þetta tækist,“ bætti Silva við.

PSG vann 1-2 sigur á Marseille í gær með mörkum frá Zlatan Ibrahimovic og Ángel di María.