Van Gaal: Fólkið á rétt á að baula á mig

Louis van Gaal, knattspyrnustjóri Manchester United, er undir mikilli pressu en fyrr í dag töpuðu lærisveinar hans fyrir Southampton á heimavelli, 0-1.

Charlie Austin skoraði eina mark leiksins á 87. mínútu en United skapaði sér varla færi í dag. Eftir leikinn létu áhorfendur á Old Trafford óánægju sína í ljós.

„Stuðningsmennirnir eiga rétt á að baula á mig. Það er réttmætt, ég sá alveg hvað gerðist í leiknum,“ sagði van Gaal eftir leikinn.

United er nú fimm stigum frá 4. sætinu og þarf að gefa í ætli liðið sér að leika í Meistaradeild Evrópu á næsta tímabili.

„Við þurfum að standa saman, hvort sem það gengur vel eða illa. Við leggjum mjög hart að okkur en meiðsli hafa leikið okkur grátt,“ bætti van Gaal við.