Gylfi Þór gæti fengið nýjan liðsfélaga frá Palace

Velska félagið Swansea sem Gylfi Þór Sigurðsson spilar með í ensku úrvalsdeildinni er á höttunum eftir Dwight Gayle, framherji Crystal Palace.

Swansea þarf að ganga frá kaupunum fyrir klukkan ellefu á mánudagskvöldið þegar janúarglugganum verður lokað.

Takist Swansea að kaupa enska framherjann er talið nokkuð víst að Frakkinn Bafétimbi Gomis sé á útleið hjá velska liðinu.

Crystal Palace keypti Gayle fyrir sex milljónir punda í júlí 2013 frá Peterborough, en það var félagsmet á þeim tíma.

Palace vill vafalítið fá svipaða upphæð fyrir Gayle sem var síðasta sumar orðaður við félög á borð við Bournemouth og Bristol City í B-deildinni. Tilboði Bristol var reyndar tekið en Gayle vildi ekki fara aftur í B-deiildina.

Gayle er búinn að skora 23 mörk fyrir Palace síðan hann kom þangað fyrir hálfu þriðja ári, en hann hefur ekki skorað síðan í september þegar hann setti þrennu á Charlton í leik í deildabikarnum.