Ensk goðsögn samdi við lélegasta lið Englands

Hinn 53 ára gamli Stuart Pearce er búinn að rífa skóna fram úr hillunni og ætlar að hjálpa lélegasta liði Englands.

Þessi gamli bakvörður er búinn að skrifa undir samning við Longford AFC sem er einfaldlega þekkt á Englandi fyrir að vera lélegasta lið landsins.

Longford er búið að tapa öllum átján leikjum sínum í vetur. Fá á sig 179 mörk og aðeins skora eitt. Eins og glöggir sjá er liðið að fá á sig um tíu mörk í leik og veitir því ekki af aðstoð í vörninni.

„Grasrótarfótbolti er hjartað í leiknum og því ákvað ég að stökkva á þetta tækifæri,“ sagði Pearce. „Ég byrjaði sjálfur í utandeildinni og ég hlakka til að aðstoða liðið. Það vantar sjálfstraust í klefann.“

Stjórinn Nick Dawe var að vonum í skýjunum með nýja leikmanninn þó svo hann sé aðeins kominn af léttasta skeiði.

„Fyrir ári síðan vorum við að spila fyrir framan einn áhorfanda og hundinn hans. Nú eigum við von á hundruðum manna til þess að sjá fyrsta leikinn hans. Stuart fær samt enga sérmeðferð,“ sagði Dawe grjótharður.

Pearce spilaði yfir 400 leiki fyrir Nott. Forest áðir en hann fór til Newcastle, West Ham og Man. City. Hann spilaði 78 landsleiki fyrir England.