Real og Atletico Madrid dæmd í félagaskiptabann

Real Madrid og Atletico Madrid hafa bæði verið fundin sek um brot á reglum Alþjóðaknattspyrnusambandsins, FIFA, um félagaskipti leikmanna átján ára og yngri.

Bannið svipar til þess sem Barcelona var dæmt í á sínum tíma og mega Madrídarliðin ekki kaupa nýja leikmenn til félagsins í sumar og í janúar á næsta ári. Félögin mega þó nota núverandi félagaskiptaglugga til að semja við nýja leikmenn.

Félögin fengu þar að auki peningasektir. Atletico Madrid þarf að greiða 115 milljónir króna í sekt og Real Madrid 46 milljónir.

Reglurnar sem félögin brutu snúa að leikmönnum yngri en átján ára. Brotin hjá Real Madrid ná aftur til 2005 en aftur til 2007 í tilfelli Atletico Madrid.

Samkvæmt reglum FIFA er félögum óheimilt að semja við ungmenni sem eru ekki búsett í viðkomandi landi nema í sérstökum tilvikum. Það er heimilt ef foreldrar viðkomandi ungmenna eru að flytja á milli landa af ástæðum ótengdum knattspyrnu eða ef heimili viðkomandi er innan við 50 kílómetra frá viðkomandi félagi, óháð landamærum.

Félagaskipti innan evrópska efnahagssvæðisins eru þó heimil frá og með sextán ára aldri.

Barcelona var sett í samskonar bann í apríl árið 2014 og fékk ekki að skrá nýja leikmenn hjá félaginu fyrr en um áramótin.