Rooney skoraði sigurmarkið gegn Swansea | Sjáðu markið hjá Gylfa

Wayne Rooney skoraði sjaldséð deildarmark í 2-1 sigri Manchester United á Swansea í ensku úrvalsdeildinni í dag en þetta var fyrsta mark hans í ensku úrvalsdeildinni frá því í október.

Gylfi Þór Sigurðsson var að vanda í byrjunarliði Swansea sem var taplaust í síðustu þremur leikjum fyrir leik dagsins.

Fyrri hálfleikur var afar bragðdaufur og var staðan markalaus í hálfleik en heimamenn í Manchester United voru ekki lengi að láta til sín taka í seinni hálfleik.

Á upphafsmínútum seinni hálfleiks kom Anthony Martial, Manchester United yfir með snyrtilegu skallamarki eftir fyrirgjöf Ashley Young.

Gylfi jafnaði metin tuttugu mínútum fyrir leikslok með skalla sem David De Gea í marki Manchester United réði ekki við en leikmenn Manchester United voru snöggir að svara.

Aðeins sjö mínútum síðar kom Wayne Rooney Manchester United aftur yfir eftir góðan undirbúning Martial en það reyndist vera sigurmark leiksins.

Swansea fékk færi til þess að jafna metin aftur og komst Lukasz Fabianski, markvörður liðsins, hvað næst því en skalli hans fór hárfínt framhjá á lokasekúndum leiksins.

Með sigrinum skaust Manchester United aftur upp í 5. sæti ensku úrvalsdeildarinnar, tveimur stigum á eftir Tottenham sem eiga leik til góða gegn Everton á mánudaginn.

Gylfi jafnar metin: Rooney kemur Manchester United aftur yfir: