Bjartsýnn á að Færeyingar fái fullt sjálfstæði

Þjóðaratkvæðagreiðsla um nýja stjórnarskrá fer fram í Færeyjum á næsta ári. Högni Höydal, sjávarútvegsráðherra eyjanna, er bjartsýnn á að Færeyingar fái fullt sjálfstæði innan sex til átta ára. Þrír ráðherrar úr færeysku landsstjórninni eru nú í heimsókn á Íslandi.

Högni Höydal sjávarútvegsráðherra, Kirstína Háfoss fjármálaráðherra og Sirið Stenberg velferðarráðherra fóru yfir stefnu og markmið færeysku landsstjórnarinnar á ráðstefnunni í dag. Högni segir tilraunarverkefni með að bjóða út úthafsveiðiheimildir hafi tekist vel.

„Nýtt fiskveiðistjórnarkerfi kemur eftir 1. janúar 2018 og ég er sannfærður um það að samningar fáist um það að við förum frá því að gefa út kvótan í það að bjóða út kvótann,“ segir Högni. Ráðherrarnir eru allir úr Þjóðveldisflokknum en markmið landsstjórnarinnar er að tryggja að arðurinn af auðlindunum komi öllu samfélaginu að gagni. Þá kynntu ráðherrarnir breytingar á skattkerfinu til aukins jöfnuðar.

Fyrstu breytingarnar sem við tókum upp fólust í því að fara úr flötum skatti í þrepaskipt skattakerfi. Það varð til þess að skattar lág- og millitekjufólks lækkuðu,“ segir Kristina.

Þjóðveldisflokkurinn hefur lengi barist fyrir sjálfstæði Færeyinga og hefur Högni farið í fremstur í þeirri baráttu.

„Við erum sammála um það að á næsta ári verður þjóðaratkvæði um nýja færeyska stjórnarskrá og þar verði öll völdin hjá færeysku þjóðinni. Ég er sannfærður um það að sjálfstæðisbaráttan vinnist,“ segir Högni og bætir við að ef allt gangi vel gætu Færeyingar orðið sjálfstæðir innan sex til átta ára.

Katrín Jakobsdóttir, formaður Vinstri grænna, segist vilja læra af systurflokki sínum varðandi uppboðsleiðina.

„Við höfum hingað til  verið með tillögur sem byggja á blandaðri leið þar sem uppboð hefur verið einn hluti af þeirri leið. Við viljum núna læra af reynslu systurflokki okkar í Færeyjum og sjá hvernig þessi aðferð er að nýtast til að ná þessum markmiðum,“ segir Katrín.