Alda Hrönn á fullum launum á meðan rannsókn stendur yfir

Laun Öldu Hrannar Jóhannsdóttur aðallögfræðings lögreglunnar á höfuðborgarsvæðinu eru óskert þrátt fyrir að hún sé nú í ótímabundnu leyfi frá störfum vegna rannsóknar Lúðvíks Bergvinssonar setts héraðssaksóknara á meintum brotum Öldu Hrannar í starfi.

Þetta kemur fram í skriflegu svari upplýsingafulltrúa lögreglunnar við fyrirspurn Vísis. Þar segir að þetta sé „í samræmi við framkvæmd um almenna ríkisstarfsmenn í viðlíka stöðu og meðalhófsreglu stjórnsýsluréttar.“

Greint var frá því fyrr í mánuðinum að Alda Hrönn hefði stigið til hliðar sem aðallögfræðingur lögreglunnar á höfuðborgarsvæðinu vegna rannsóknar setts héraðssaksóknara. Alda Hrönn hefur stöðu sakbornings í málinu sem snýst um ásakanir á hendur henni vegna LÖKE-málsins svokallaða. Er Alda Hrönn sökuð um að hafa misbeitt valdi sínu við rannsókn á því máli.

Kærðu Öldu Hrönn meðal annars fyrir rangar sakargiftir

Tveir sakborningar í LÖKE-málinu, fyrrverandi starfsmaður NOVA og lögreglumaðurinn Gunnar Scheving Thorsteinsson, kærðu Öldu Hrönn fyrir rangar sakargiftir og meint brot hennar í starfi þegar málið var til rannsóknar en Alda Hrönn gegndi þá stöðu yfirlögfræðings lögreglunnar á Suðurnesjum sem fór með rannsókn málsins.

Í Hæstarétti var Gunnar sakfelldur fyrir að brjóta gegn þagnarskyldu opinberra starfsmanna er hann miðlaði upplýsingum til þriðja aðila sem leynt áttu að fara en honum var hins vegar ekki gerð refsing.

Vísir fjallaði ítarlega um kærur tvímenninganna en nánar má lesa um þær hér.

Ekki embættismaður heldur almennur ríkisstarfsmaður

Í svari upplýsingafulltrúa lögreglunnar kemur fram að fjarvera Öldu Hrannar frá störfum markist af rannsókn setts héraðssaksóknara og að öðrum starfsmönnum hjá LRH hafi verið falin þau verkefni sem um ræðir eftir því sem tök eru á. Þá segir jafnframt í svarinu varðandi stöðu Öldu Hrannar hjá lögreglunni:

„Vert er að nefna að hjá lögregluembættum landsins starfa bæði almennir ríkisstarfsmenn og  embættismenn. Starfsmaðurinn sem fyrirspurnin snýr að er almennur ríkisstarfsmaður. Ef embættismanni er hins vegar veitt lausn um stundarsakir, þá er lagaheimild í starfsmannalögum ríkisins að víkja viðkomandi frá störfum tímabundið á hálfum launum.“

Formaður Landssambands lögreglumanna sagði um mismunun að ræða

Árið 2014 gagnrýndi Snorri Magnússon formaður Landssambands lögreglumanna það að Gísli Freyr Valdórsson skyldi halda fullum launum þar til dómsmáli gegn honum vegna lekamálsins svokallaða myndi ljúka.

Gísli Freyr var aðstoðarmaður Hönnu Birnu Kristjánsdóttur þáverandi innanríkisráðherra en hann játaði að hafa lekið minnisblaði um nafngreindan hælisleitanda til fjölmiðla. Gísli Freyr var dæmdur vegna málsins og þá sagði Hanna Birna af sér ráðherraembætti.

Í umfjöllun Fréttablaðsins um launamál Gísla Freys sagði Snorri vandann fólginn í kaflanum um embættismenn í lögum um réttindi og skyldur starfsmanna ríkisins. Þar sé mælt fyrir um hálf grunnlaun þegar mál varði til dæmis lögreglumenn og aðra sem sérstaklega eru skilgreindir sem embættismenn. Hins vegar sé ekkert slíkt ákvæði í lögunum um aðra starfsmenn ríkisins. Þeir haldi því fullum launum þar til endanleg ákvörðun er tekin um brottvísun úr starfi.

„Hér er alveg klárlega um hreina mismunun að ræða gagnvart starfsmönnum hins opinbera og má í raun og veru segja að „embættismaðurinn“ hafi að hluta til verið fundinn sekur um refsivert athæfi þrátt fyrir að endanleg niðurstaða dómstóla liggi ekki fyrir um sekt eða sýknu í máli viðkomandi. Það er byrjað að refsa viðkomandi fjárhagslega strax í upphafi máls og á þeim tíma sem hann má í raun síst við því þar sem svona málum fylgir jafnan umtalsverður kostnaður strax á fyrstu dögum þeirra,“ sagði Snorri á sínum tíma í viðtali við Fréttablaðið.